DILI: Eis Funsionariu Públiku ida ho insial JBFAC tenke ba hatan iha tribunal tanba la entrega karreta estadu maske nia hetan ona demisaun ba kazu indisiplinar husi Komisaun Funsaun Públika (KFP).
Kazu ne’e la’os de’it dada JBFAC ba tribunal maibé lori mós arguida seluk ho inisial MC ne’ebé subtitui arguidu nia fatin hafoin hetan demisaun, tanba arguida MC asina karta autorizasaun atu karreta para nafatin iha arguidu JBFAC nia uma.
Arguidu JBFAC hetan fiar hodi assume kargu importante ida iha Institutu Nasionál Siensia Teknolojia (INCT) Ministériu Edukasaun (ME) iha 1 Outubru 2014.
Ho serbisu ne’e, ME entrega karreta ho marka Toyota Prado ho xapa matrikula 04 584 G ba arguidu atu bele fasilita ninia serbisu.
Iha 20 Jullu 2016, KFP foti desizaun hodi demite arguidu JBFAC husi funsionariu públiku tanba komete kazu disiplinar. Hafoin iha Outubru 2016, arguida MC hetan nomeiasaun hodi subtitui arguidu JBFAC.
KFP hasai desizaun ida ne’e relasiona ho desizaun Tribunal Munisipiu Dili (TMD) iha 1 Marsu 2016 ho númeru prosesu 0521/14 PDDIL ne’ebé kondena arguidu JBFAC ba krime administrasaun danosa, pekulatu, falsifikasaun dokumentus ka notasaun tekniku ho pena prizaun tinan 3. Maibé, tribunál suspende tiha ho kondisaun atu halo pagamentu ho montante $3,399.00.
Hafoin hetan karta demisaun, arguidu lori fila karreta estadu ba uma no la entrega to’o ekipa husi Komisaun Anti Korrupsaun (KAK) ba direitamente iha arguidu nia uma hodi foti karreta refere.
Liu husi audensia julgamentu iha TMD, sasin ida ho inisial CMC deklara ba tribunal katak arguidu JBFAC mak haruka atu para karreta refere iha nia uma iha area Santa Kruz.
Tuir sasin ne’e, hafoin arguidu hetan demisaun, arguidu kontinua mai tama serbisu no para karreta estadu iha nia uma.
“Tuir ha’u-nia koñesimentu arguida MC asume kargu hanesan Sekretaria Ezukutiva ba INCT tanba arguidu JBFAC hetan demisaun husi KFP,” dehan sasin iha tribunal, Segunda (04/03).
Tribunál adia julgamentu ba 11 Marsu 2019 tuku 11:00 dader hodi rona sasin husi Diretór Jéral Ministériu Edukasaun.
Kronoljia Kazu tuir akuzasaun MP
Ministériu Públiku (MP) liu husi ninia deklarasaun akuza arguidu JBFAC komete krime burla agravadu. Enkuantu, arguida MC komete krime abuzu poder.
Tuir mai akuzasaun husi MP:
Iha 20 Jullu 2016, KFP foti desizaun hodi demite arguidu JBFAC husi funsionariu públiku tanba komete kazu disiplinar.
Iha fulan Outubru 2016, arguida MC hetan nomeiasaun hodi subtitui arguidu JBFAC.
Iha 9 Agostu 2016, arguidu nia advogadu, José Texeira, halo rekursu irarkiu hasoru desizaun demite arguidu JBFAC hanesan funsionario públiku iha ME ba ba Prezidente KFP.
Iha 23 Setembru 2016, KFP hasai desizaun ho númeru 2191/2016 hodi mantein demisaun ba arguidu.
Iha 7 Outubru 2016, Diretor Jeral Administrasaun no Finansas ME, Antonino Pires, haruka karta ida ba arguidu JBFAC hodi husu entrega fali patrimoniu estadu ho prazu to’o 11 Outubru 2016, maibé arguidu la entrega.
Iha loron ne’ebé la apuradu, maibé iha fulan Outubru 2016 nia klaran, arguida MC hetan nomeiasaun hodi assume kargu Sekretaria Ezekutivu INCT.
Iha 28 Outubru 2016, arguidu JBFAC halo karta relatoriu entrega ba Sekretaria Ezekutiva, arguida MC, maibé realmente veikula refere la entrega nafatin ho razaun para fatin ba veikulu refere laiha.
Iha 1 Janeiru 2017, arguidu JBFAC prepara karta ida ho kontiudu autorizaun atu veikula refere para nafatin iha arguidu nia uma ho razaun INCT laiha para fatin ba veikula refere no veikula refere segundu maun ne’ebé presiza ema tau-matan.
Hafoin prepara karta refere, arguidu lori ba arguida MC hodi asina. Arguida MC simu no asina mediata karta refere.
Iha loron la apuradu, motorista ho inisial CMC ba arguidu JBFAC hodi hamanas karreta no tula arguidu JBFAC hafoin ba tula fali arguida MC iha Bairu Pite. Iha loraik CMC ba tula arguidu sira hafoin hatuun uluk arguida MC no ikus hatun arguidu JBFAC no para karreta iha ne’ebá. Karreta estadu ne’e para iha arguidu JBFAC nia uma durante fulan neen nia laran.
Iha 20 Abril 2017, ekipa husi KAK ba arguidu nia uma hodi foti karreta refere.
Ho hahalok ne’e, MP deklara, arguidu JBFAC no arguida MC hamosu prejuizu ba estadu tanba tula arguidu JBFAC ne’ebé la’os funsinariu ona.
