HAK kondena hahalok oknum PNTL ladún profisionál, tanba lori gás matan tiru tama ba sala aula, bainhira estudante no dosente sira hala’o hela prosesu aprendizajen.

HAK husu atu halo investigasaun ba kazu ne’e, hodi lori prosesu ba Ministériu Públiku prosesu tuir lei.

“Ita nia ajente estadu liu-liu PNTL ne’ebé atu asegura ema hotu nia direitu iha situasaun ne’ebé seguru importante mós investigasaun kle’an mós ba sira,” dehan Advokasia HAK, Xisto dos Santos ba Jornalista sira iha edifísiu HAK Faról, Tersa (22/08).

Nia dehan, HAK lamenta asaun polisia tiru gás matan halo estudante balun ne’ebé la sala tenke sai vítima hodi sofre moras matan too baixa iha ospitál.

Nia dehan, hafoin asaun anarkizmu ne’e mosu, grupu sosiedade sivíl sira halibur malu hodi buka evidénsia hodi lori keixa ba Ministériu Públiku atu investiga oknum polisia.