Laen ida ho inisial LJC ho oin triste ne’ebé nakonu ho arrepende husu deskulpa ba nia feen ho inisial MS ne’ebé lori nia ba tribunal tanba kazu violensia domestika.

Tuir deklarasaun husi lezada MS, durante sira moris hamutuk nu’udar feen ho laen dezde tinan 2009 to’o 2017, arguidu sempre baku hela de’it nia.

Aleinde liman kaman baku nia feen, MS dehan, nia laen mós sempre deskonfia nia ba mane seluk hodi provoka sira diskuti malu.

Tuir akuzasaun husi Ministériu Públiku iha 28 Abril 2017 tuku 19:00 Otl iha Likisa bainhira feen ho laen ne’e fila husi merkadu Taibessi, Dili hafoin lezada ne’ebé nu’udar negosiante modo, mosu diskusaun entre lezada ho arguidu.

Iha altura ne’ebá, tuir MP, arguidu baku lezada, tuku nia kanuruk, tebe iha kidan no basa lezada nia hasan.

Hafoin lee akuzasaun, MP iha ninia alegasaun final husu ba tribunál atu aplika pena prizaun tinan 2 suspende ba tinan 3. Enkuantu parte defeza husu atu aplika pena suspensaun.

Rona tiha deklarasaun husi MP no defensór públiku, tribunál husu ba arguidu atu hato’o lia-fuan ikus. Iha nia lia-fuan ikus, arguidu deklara arrepende ba nia hahalok ne’ebé durante ne’e nia halo ba lezada no arguidu ho oin triste husu deskulpa ba lezada hodi promete iha futuru sei la halo tan.

Tribunál adia julgamentu ba loron seluk hodi rona desizaun final.