2017, ALFeLa Fó Asisténsia Legál ba Feto- Labarik 703 Featured

By INDEPENDENTE Outubru 30, 2018 6733
Asisténsia Legál bá Feto no Labarik (ALFELA) lansa relatóriu Anuál 2017. FOTO: INDEPENDENTE/Isabel dos Anjos. Asisténsia Legál bá Feto no Labarik (ALFELA) lansa relatóriu Anuál 2017. FOTO: INDEPENDENTE/Isabel dos Anjos.

DILI:  Tuir relatóriu anuál 2017, Asisténsia Legál bá Feto no labarik (ALFeLa) fó asisténsia legál ba feto no labarik ne’ebé hasoru kazu krime no kazu sivíl hamutuk 703.

Iha loron, Segunda (29/10), ALFeLa  lansa nia relatóriu anuál 2017 ba feto no labarik iha munisípiu 12 inklui RAEOA maioria hasoru kazu kriminál no sivíl ho porsentu 89.

Prezidente BOARD ALFeLa Afonso Lopes,  agradese ba membru ALFeLa hotu ba susesu sira, maski hasoru dezafiu balun.

Tanba, nia dehan iha Timor-Leste organizasaun sosiedade sivíl ne’ebé  servisu ba vítima violénsia bazeia ba jéneru foin ONG ALFELA de’it.

ALFeLa nia servisu mak fó asisténsia legál ba feto no labarik sira inklui defisiénsia no grupu LGBTI ne’ebé hasoru kazu krime no sivíl sira.

Iha  relatóriu anuál, nia dehan ALFeLa fornese asisténsia legál ba 703 kompostu husi feto ho idade joven na’in 199  no 146. Ba labarik feto no mane na’in 358,  kazu maioria husi kazu kriminál  ho porsentu 89 no kazu sivíl no seluk ho porsentu 11. Kazu ne’ebé Tribunál deside taka hamutuk 178 no seluk sei iha prosesu laran.

Nia dehan, asisténsia legál ne’ebé ALFeLa fó liu husi fornese informasaun legál, akompaña prosesu rejistu kazu, prosesu too desizaun iha tribunál.

ALFeLa fornese mós asisténsia adisional, fasilita akomodasaun ba kliente no família sira.

Fundasaun Asia suporta ba ALFeLa atu kontinua fornese asisténsia legál ba feto no labarik no mós vitima sira ne’ebé mak iha esperiénsia ba violasaun bazeia ba jeneru.

Aleinde ne’e, IWDA mós suporta ALFeLa hodi fó treinamentu kona ba asesu sistema justisa formál ba komunidade no lideransa komunitariu sira na’in 281  husi suku ualu.

Iha tinan 2017, ALFeLa hamutuk ho grupu advokasia hetan susesu bainhira sira nia lobi no rekomenda inklui influénsia hodi hetan promulgasaun ba lei tráfiku Umanu iha fulan Janeiru 2017.

 

Rate this item
(0 votes)

Independente Digital TV