Portavoz SIJK, Dra. Odete Viegas da Silva hatete, relasiona ho sidadaun Portuges ne'ebé konfirmadu pozitivu Covid-19, Ministériu Saúde orienta parte Saúde Munisipiu Likisa atu halo screening ba pasiente sira ne'ebé konsulta iha Sentru Saúde.

"Tanba relasiona ho kazu profesora portugues sira ne’ebé mak konfirmadu pozitivu ne’e keta iha ona transmisaun lokal iha ne’eba. Entaun tenke tau atensaun hodi halo screening," dehan nia iha Sala Situasaun Sentru Konvensaun Dili, Kuarta (22/04).

Entretantu, tuir dadus husi Sentru Integradu Jestaun Krize (SIJK) iha Kuarta (22/04) Timor-Leste la rejista kazu foun Covid-19.

Odete dehan, to'o iha Kuarta númeru konfirmadu ba pozitivu Covid-19 sei nafatin 23. Husi númeru ne'e na'in ida rekopera no na'in 22 iha fatin izolamentu.

“Kazu konfirmadu mantein 23, rekuperadu 1, suspeitu hamutuk 370, hein rezultadu 47 no provavel 4,” dehan Odete iha Sentru Konvensaun Dili, Kuarta (22/04).

Kona-ba Timor-oan ne'ebé iha kuarentena, nia informa, daudauk ne'e iha ema na'in 492 mai sei hela iha kuarentena, kompostu husi na'in 414 iha Dili no na'in 78 iha munisipiu.

To'o horseik, nia dehan, ema ne’ebé passa ona loron 14 iha kuarentena hamutuk na'in 1.548, kompostu husi Dili hamutuk na'in 1.232 no iha munisipiu na'in 316.

Iha oportunidade ne'e, Odete kontinua fó hanoin ba povu tomak atu tau atensaun nafatin ba ijiene pessoal no distansiamentu sosial.