Prezidente Konfederasaun Sindikatu Timor Leste (KSTL) Almero Vila Nova informa, iha fulan rua dahuluk, Marsu to’o Maiu, trabaladór na’in 105 mak lakon serbisu, no iha fulan tolu tuir mai iha trabaladór na’in 35 mak lakon serbisu.

“Husi kazu sira ne’e mak ami rejistu iha fulan Marsu mai to’o Maiu nia laran hamutuk 105, hafoin hahu fulan Juñu mai to’o agora (Agostu) ami rejistu fali kazu 35, total kazu 140 mak akontese durante EE dahuluk to’o dahaat,” informa Almero iha nia serbisu fatin, KSTL, Bemori, Sesta (14/08).

Tuir nia, kazu balun kompaña hapara kontratu serbisu tanba kondisaun serbisu laduun di’ak, liu-liu iha assuntu seguransa saúde no iziene iha serbisu fatin. Kazu seluk, relasiona ho lisensa maternidade iha tempu EE.

“Inan feto sira balun partus, hafoin liu tiha fila fali ba kontiunua serbisu, maibé kompañia aproveita situasaun hapara tiha, kazu ne’e relasiona mós ho paternidade katak lisensa ba mane atu haree feen ne’ebé partus,” dehan nia.

Tuir lei trabaladór, nia hatutan, trabaillador mane sira iha direitu ba lisensa loron lima, no nia iha nafatin direitu ba pagamentu.

Maibé, iha kazu balun, Almero dehan, hafoin sira husu lisensa tanba sira-nia feen partus, ikus mai nia salariu durante loron lima ne’e kompañia la selu.

Hafoin simu kazu ne’e, nia hatete, KSTL esforsu hodi ajuda trabaladór sira atu bele hetan sira-nia direitu indinimizasaun.

Husi total kazu ne’ebé tama, nia hatutan, KSTL konsege rezuldo porsentu 99 kazu.

“Trabaladór sira sira hetan hotu direitu ba indeminizasaun, kazu ne’e 99% rezolvidu husi over time, maternidade, paternidade, subsidiu, no mós problema sira seluk, maibé porsentu 1 mak nia prosesu sei kontinua,” dehan nia.

Ba kazu ne’e sei prosesu hela, nia hatete, kompañia tolu mak hapara sira-nia trabaillador sein razaun ruma, no laiha rekoñesimentu ba traballador sira-nia direitu.

Bainhira buka solusaun ba problema ne’ebé trabaladór hasoru, nia dehan, iha kompañia balun hatudu sira-nia inisiativa di’ak hodi kolabora ho KSTL fó solusaun ba problema ne’ebé iha, tanba sira lakohi prejudika sira-nia serbisu, maibé iha mós kompañia balun ulun-toos, lakohi kumpre lei no lakohi halo negosiasaun ho sindikatu.

Baibain, nia hatutan, KSTL sempre halo negosiasaun bipartida, katak parte kompaña no trabaladór tuur hamutuk buka solusaun. Bainhira laiha solusaun, dalan seluk mak ba iha mediasaun tripartida ne’ebé envolve governu hanesan mediador, no prosesu tan arbitrajen traballu. Bainhira la hetan nafatin solusaun rekursus ikus liu ba iha tribunal.

“Ita-nia lei hateten parte ida bele halo rekursu ba tribunal maske desizaun foti iha arbitrajen prosesu ba tribunal, maibé kestaun boot ida mak ita-nia tribunal la fó prioridade ba traballadór, entaun sira sai vitima,” katak Almero