Tuir informasaun ne’ebé jornál INDEPENDENTE sita husi ajensia lusa Kuarta (20/03), Silk Air deside hodi hapara ninia operasaun iha Timor Leste tanba prosesu naruk inserteza ne'ebé dada dezde tinan 2018 nia rohan, kona-ba estatutu Air Timor, ho indesizaun kona-ba lisensa ne'ebé fó ba empreza husi Servisu Verifikasaun no Rejistu Emprezarial (SERVE).
"Ami halo operasaun sira ne'e durante tinan 10. No agora ami tenke taka voo ne'e", hatete diretor Air Timor, Syed Abdul Rahman.
"Ami hakarak mantein Air Timor hodi opera no ami estuda hela solusaun alternativa sira, karik ba rota sira seluk. Prosesu ne'e, iha minimu sei demora entre fulan tolu to’o neen," nia esplika.
Ho desizaun ne’e, iha Kuarta (20/03) liu husi reuniaun Konsellu Ministru deside atu haruka Ministru Transporte no Telekomunikasaun (MTT), José Agostinho da Silva, akompaña husi Ministru Negosiu Estranjeiru Deonisio Babo sei aranka ba Singapura hodi koalia ho kompaña Silk Air.
Ministru Estadu Prezidensiál no Konsellu Ministru, Hermengildo Pereira hatete, governu preukupa ho Kompaña Aviasaun husi Singapura Silk Air ne’ebé ameasa hapara operasaun rute Dili-Singapura.
Nia hatutan, hapara operasaun ne’e la’os de’it difikulta pasajeiru sira-nia viajen ba rai li’ur, maibé mós fó ameasa ba ligasaun entre Singapura ho Timor Leste.
“Uluk ita preokupa ho folin billete aviaun no agora ita preukupa ho Aviaun Silk Air hapara operasaun mai Timor Leste,” dehan Agio ba jornalista sira iha Palásiu Governu, horseik.
Nune’e, nia dehan, KM deside iha tempu badak nia laran sei delega Ministru José Agostinho no MNEK ba Singapura hodi extende akordu ne’ebé molok ne’e Timor Lestes ho Kompañia Aviasaun Silk Air asina.
“Desizaun Konsellu Ministru interese kontinua extende kontratu nune’e normaliza operasaun rute Dili-Singapura atu labele difikulta pasajeiru viajen ba estranjeiru,” deklara nia.
Entretantu, Sita husi rttlep.tl, Diretór Ezekutivu SERVE, Florencio Sanches informa, kompaña Silk Air haruka ona karta kanselamentu ba SERVE atu la halo operasaun iha Timor Leste ho razaun dekretu lei SERVE difikulta sira atu halo operasaun iha Timor Leste.
Florencio deklara, kompaña sira ne’ebé hakarak investe iha Timor Leste, iha obrigasaun atu tenke halo tuir regra ne’ebé aplika iha Timor Leste.
