“Ha’u ho ministru planeamentu rasik mak halo inspesaun ne’e. Tanba haree presiza hadi'a tan buat balun hanesan mákina, aparellu navegasaun nian entaun sei kontinua hadi'a,” dehan Vise-ministru Obras Publika no Transporte Komunikasaun, Inácio Moreira, iha Palasiu Governu, horisehik.

Nia esplika, aparellu hirak ne’ebé husu atu hadi’a hodi bele hetan ró ho kapasidade di'ak, tanba governu iha planu atu orienta Ró Haksolok ba halo operasaun iha área Tasi-Mane nian.

Inácio hateten, Governu seidauk determina tempu bainhira mak ró ne’e atu mai Timor, maibé husu nafatin atu kontinua hadi'a para bele hetan kualidade ró ida di'ak liu.

“Ne’e orgullu boot ida ba nasaun Timor Leste tanba governu hasai osan ho montante millaun 13.5 (Euros) hodi hetan ró foun”, tenik nia.

Eis Deputadu husi Bankada FRETILIN ne’e akresenta liután katak, Ró Haksolok la’ós segunda mão, maibé halo foun. Ninia xapa mós foun no kualidade, inklui mákina sira mós foun.

Prosesu aprovizionamentu ne’e halo iha 2013, kompañia empreza Atlantic Eagle CPR husi Portugál mak manan.

Portu Suai Atinji 99%

Nune’e, kona-ba konstrusaun Aeroportu Suai Vise-MOPTEK afirma, oras ne’e atinji ona 99% ne'ebé hatudu katak tama ona iha faze preparasaun ba inaugurasaun.

Ne'e duni Ministériu Obras Publika tuir planu sei inaugura iha loron 20 Juñu ba aeroportu ne’ebé konstrui ho orsamentu purvolta tokon $67.