Parlamentu Nasionál halo diskusaun no votasaun ba prosesu urjensia ba proposta lei númeru 1/V autorizasaun extraodinaria kona-ba realizasaun ba transferensia fundu petroliferu.

Governu hato’o pedidu ho karater urjensia no normal, maibé iha diskusaun parlamentu nasional konsidera prosesu ne’e urjente tanba ne’e deputadu sira aprova ho votus a favor 36, kontra 27 no apstensaun 1.

Ministra Finansas Sara Lobo hatete, iha fulan Jullu nia laran ministériu finansas hasoru obstaklu barak kona-ba finansamentu públiku nian tanba ne’e sira halo pedidu ba PN atu aprova Fundu Petroliferu ho karater urjensia hodi responde prosesu ba funsionamentu makina estadu iha fulan rua nian.

“Ami husu ba parlamentu nasional atu autoriza hodi halo transferensia osan husi fundu petroliferu ho montante tokon $140 hodi funsiona makina estadu nian iha fulan Jullu no Agostu nian,” dehan nia iha parlamentu nasional, Sesta (20/07).

Nia esklarese, husi total osan tokon $140 ne’e, sei foti uluk tokon $70 iha fulan Jullu hodi selu ba salariu no vensimentu no halo transferensia públiku hodi selu veteranus, bolsa da mãe, no mós ba setor importante sira hanesan edukasaun, saude, kombustivel ba eletrisidade no seluk tan.

Iha fatin hanensan, deputadu FRETILIN Francisco Branco hatete, pedidu ne’ebé governu husu atu foti osan husi fundu petroliferu ne’e importante.

“Kuandu governu nia osan iha kofre la to’o ona tokon $200 bele foti liu husi transferensia fundu petroliferu la presiza debate fali iha Parlamentu Nasionál maibé mai fó de’it koñesimentu atu nune’e labele demora,” dehan nia.

Tuir nia, Governu husu pedidu atu halo transferensia fundu petroliferu ho karater urjensia maibé halo fali debate naruk tan ne’e deputadu ne’e hanoin laiha espiritu ida ne’ebé ho karater urjensia.

Iha fatin hanesan, tuir deputada CNRT Carmelita Moniz, iha VII Governua foti osan husi fundu petroliferu la liu husi PN ne’e kontra lei, tanba ne’e iha VIII governu hakarak atu tuir dalan ne’ebé legal.

Tuir nia, daudauk ne’e osan iha kofre governu husi osan duadesimu hela de’it tokon $20 tan ne’e la to’o atu sustenta makina estadu.

“Governu aumenta tan osan ho montante tokon $140 ne’e atu funsiona makina estadu ida ne’e di’ak liu tan hodi hein orsamentu jeral estadu foun,” dehan Carmelita.