Tuir dadus husi SERVE iha fulan rua ikus ne’e, Kompañia hamutuk 300 mak hato’o pedidu atu taka sira-nia Kompañia.

Razaun husi Kompañia hirak ne’e taka sira-nia Kompañia tanba sira la hetan lukru no laiha osan atu selu taxa.

Diretór Jeral SERVE Florencio Chances informa, Kompañia hirak ne’ebé taka maioria Kompañia estranjeiru, kuaze porsentu (%) 70 no Kompañia nasionál ho porsentu 30.

“Iha fulan tolu ba kotuk kuaze loron ida ami simu pedidu (taka Kompañia) rua ka tolu,” informa Florencio ba jornalista sira iha nia knaar fatin, Matadoru, Kuarta (18/07).

Ba pedidu husi Kompañia internasionál, Florencio dehan, SERVE husu ba Kompañia-nain sira hapara de’it sira-nia atividade nune’e Kompañia bele eziste nafatin no bainhira situasaun la’o di’ak ona bele hala’o fila fali sira-nia atividade.

“Balun lakohi ona atu loke negosiu tanba sira labele ona atu selu taxa no ami asina duni sira-nia pedidu atu taka Kompañia. Dala-ruma rua ka tolu lorloron no sira dehan labele duni tanba laiha rendimentu no susar atu selu sira-nia taxa,” dehan nia.

Iha fulan rua ikus, Diretor ne’e informa, númeru Kompañia ne’ebé hakarak taka atinze to’o 300.

“Sira ne’ebé mak taka ne’e sira ne’ebé (hala’o atividade iha area) negosiu. Sira taka duni no husi (Kompañia ne’ebé hala’o atividade iha area) konstrusaun nian mós hanesan, sira mós mai diretamente atu taka totalmente tanba Kompañia boot sira husi li’ur mai atu investe iha projetu de’it ne’e liu porsentu 50. Ba negosiu, sira barak (mak) hakarak atu taka tanba sira-nia loza la hetan lukru,” deklara nia.

Ho situasaun ne’e, Diretór ne’e afirma, SERVE foti desizaun hodi husu ba Kompañia-nain sira atu labele taka sira-nia Kompañia maibé taka de’it atividade, hafoin situasaun polítika rai laran la’o normal, bele loke fila fali.

“Kona-ba taxa, ami-nia lei mós fó dalan katak taxa ne’e bele relata tau zero (0) lai atu nune’e hatudu katak Kompañia la taka maibé hapara de’it atividade no balun konkorda maibé (Kompañia) husi nasaun Europa sira lakohi, (sira) hakarak taka totalmente no ami hein hela sira-nia pedidu,” deklara nia.

Aleinde ne’e, Diretór ne’e informa mós kona-ba rejistu ba Kompañia ne’ebé iha tinan ne’e tuun liu kompara ho tinan kotuk.

Iha tinan kotuk, nia dehan, kada loron SERVE bele halo rejistu ba Kompañia to’o 400 resin, maibé daudauk ne’e tuun liu, loron ida to’o de’it 200 resin.

Ba númeru ne’ebé tuun, tuir nia, bele mós tanba ho politika husi Kompañia Xineza ne’ebé hafoin tinan tolu (3) sei taka sira-nia Kompañia no se la taka sei transfere fali ba ema seluk.

Maske nune’e, nia dehan, karik mós iha problema iha sistema rejistu nian. Tan ne’e iha futuru presiza hadi’a di’ak liu tan.