Funsionamentu mákina estadu nian sei garantidu nafatin tanba orsamentu ba verba saláriu e vensimentu no mós bens e servisu alokadu nafatin ba tinan ida nian. Verba hirak ne’ebé la aloka ba osan duadesmu maka kapitál dezenvolvimentu no kapitál menór.

Tuir deputadu bankada CNRT, Dionísio Babo Soares, orsamentu duadesimu ne’e uza de'it ba saláriu vensimentu no bens servisu hodi funsiona mákina estadu hodi hein aprovasaun programa no orsamentu estadu nian.

“Orsamentu duadesimu ne’e la'ós uza de'it iha Janeiru no Fevereiru de'it, maibé nia prinsípiu ne’e uza to’o hetan aprovasaun orsamentu jerál”, tenik nia, iha Uma Fukun PN, horisehik.

Tanba ne’e, husu ba públiku atu labele hanoin katak orsamentu duadesimu ne’e atu uza iha fulan rua de'it, maibé bele liu.

Normalmente kada tinan baibain uza de'it iha fulan rua nia laran, to’o Marsu ne’e OJE la’o di'ak ona maibé ne’e depende de'it ba situasaun polítika.

Iha fatin hanesan, Deputadu Juvinal Mericio Akara hatete, atu garantia mákina estadu ne’e la’o nafatin sei iha fonte orsamentál rua hodi asegura funsionamentu estadu ne’e nian.

Husi fonte orsamentál rua mak hanesan ida bele kontinua duadesimu ne’e eziste to’o hetan aprovasaun OJE ba tinan 2018 nian atu bele funsiona nafatin estadu ne’e.

Husi fonte seluk mak bele halo proposta lei espesiál ida atu governu ne’e bele asesu ba fundu petrolíferu.

Maibé, atu tama ba prosesu sira ne’e tenke hakotu lai inserteza polítika ne'ebé akontese hela. Governu tenke mai aprezenta ona programa atu la liu karik bele fó oportunidade ba Prezidente Repúblika hodi halo desizaun.

Entretantu, Prezidente PN, Aniceto Guterres hatete, programa primeiru ne'ebé hetan rejeisaun husi opozisaun sira meza entrega hikas ba iha governu hodi halo elaborasaun dadus hafoin lori hikas mai iha Parlamentu Nasionál.

Maibé to’o agora seidauk lori tanba laiha lei ida ne'ebé determina data katak data hanesan ne’e programa tenke lori mai ona.