Ministru Obras Publika (MOP), Salvadór Pires hateten, bazeia ba Lei 13/2019, Governu iha devér atu halo pagamentu ba projetu ne’ebé kontrata ona empreza publika sira hodi implementa projetu konstrusaun fíziku.

Maski nune’e, bazeia ba deklarasaun Xefe Governu, Taur Matan Ruak, antes halo pagamentu tenke koordena ho Parlamentu Nasionál hodi forma komisaun eventuál atu fiskaliza projetu ne’ebé akordu antes ona.

“Ami selu maibé iha fiskalizasaun rigorozu hodi haree gastu sira ne’e bazeia ba ezekusaun ho kualidade iha terrenu”, dehan Salvadór, iha Uma Fukun PN, horisehik.

Tuir nia, Governu la halo pagamentu bainhira projetu laiha kualidade, nune’e atu halo pagamentu ne’e difisil tebes, tanba planu atu salva orsamentu.

Maski MOP prefere iha OJE 2018 ne’e propoin orsamentu tokon $3, nune’e tokon $1 atu halo pagamentu ba projetu sira ne’ebé kategoria retensaun ona, nune’e tokon $2 Governu rezerva bainhira projetu emerjénsia ruma prontu atua lalais.

Tipu projetu sira ne’e mak konstrusaun sivíl sira liuliu estrada, ponte, eletrisidade ne’ebé antes ne’e Governu anteriór halo kontratu ho empreza sira.

Ne’e duni, Governu fiar katak, iha tempu badak nia laran sei koordena ho Parlamentu Nasionál atu forma komisaun eventuál hodi identifika projetu 142 ninia servisu durante ne’e.