Ho preokupasaun ne’e, Ministru Obras Públiku Transporte no Komunikasaun (MOPTK), Gastão de Sousa dehan, karik iha kompañia balun la satisfás ho desizaun governu hili ETO no SAKOM fornese mina ba sentrál eletrisidade rua ne’e, governu sei haree no rona sira nia preokupasaun.

“Desizaun deside Kompañia ETO no SAKOM mak manan, maibé kuandu iha reklamasoens ruma depois mak ita haree,” dehan Ministru Gastão ba jornalista horisehik.

Nia dehan, ETO no SAKOM Fuel manan tender ne’e, hafoin governu no Comisaun Nasionál Aprovizionamentu (CNA) aprezenta prosesu tender  hodi estuda haree katak, kompañia rua iha kapasidade hodi fornese mina, tanba durante ne’e ETO rasik fornese ona mina ba governu.

Iha prosesu tender, PERTAMINA Indonézia no kompañia rua seluk lakon iha prosesu.

Nia dehan, Kompañia PERTAMINA Indonézia la manan iha tenderizasaun ne’e nu’udar prosesu ida, tanba, ne’e konkursu públiku tenke iha lakon no manan.

“Ita labele hatene tanba ne’e prosesu administrativu, téknika administrativu, no proposta finanseira,” tenik nia.

Prepara Osan Tokon $80

Iha parte seluk, Gastão dehan, governu aloka orsamentu  tokon $80 liu ba sentru  Eletrisidade Hera ETO kaer ho tokon $60 no Sentrál Betanu SAKOM Kaer tokon $20.

Nia dehan, razaun ba presu la hanesan tanba Sentrál Hera kontinua ho mákina tolu (3) no Betanu ho mákina ida(1).

Ministru ne’e salienta liu tan katak ETO no SAKOM hahú agora tenke haruka ona kontratu ba tribunál de kontas hodi hetan vistu. Atu nune’e labele iha failansu iha dokumentu sira bainhira hahú servisu.

Tuir planu governu nian iha loron 1 Jullu agora ETO no SAKOM Fuel sei  hahú fornese mina ba sentrál rua ne’e.