Ministru Reforma Lejizlativa Asuntu Parlamentár (MRLAP), Fidelis Magalhães hateten, Konsellu Ministru analiza dokumentu husi kompañia operadór telekomunikasaun Ceslink, ne’ebé hakarak atu investe ba área telekomunikasaun nian.
“Sira hakarak kompete iha telekomunikasaun iha ita nia rai. Konsellu Ministru mós aprova sira nia partisipasaun telekomunikasaun”, dehan nia, iha Palásiu Governu, horisehik.
Nia dehan, Ceslink hakarak kompete tanba liña telekomunikasaun balun seidauk la’o di’ak. Nune’e, povu dala barak halerik iha rede telekomunikasaun. Ne’e duni, prezensa Ceslink hakarak kompete Timor Telecom, Telkomcel, no Telemor iha mundu informasaun.
Nia dehan, Ceslink nu’udar konsórsiu nasionál, Ok-D’tel sai hanesan operadór ba telekomunikasaun ba dahaat iha Timor Leste.
Ceslink mós hakarak oferese kampu traballu, liuliu área telekomunikasaun ho kualidade. Tanba prezensa Ceslink hakarak serbisu rede telekomunikasaun fasil asesu no baratu ho teknolojia modernu ho efisiente, nune’e garante liña ínternet ho velosidade lalais ba ligasaun telemovel iha territóriu tomak.
Entretantu, investidór Oka-D’tel, Mahoka hateten, ekipa husi operadór Ceslink aprezenta rezolusaun bo Konsellu Ministru hodi foti desizaun kona-ba prezensa operadór telekomunikasaun atu kontribui liña telekomunikasaun.
Nia dehan, orsamentu ne’ebé Ceslink tau hanesan seguransa hamutuk tokon $21, nune’e iha faze dahuluk Ceslink gasta ona tokon $5 hodi sosa materiál no ekipamentu, liuliu torre, ne’ebé hahú ona monta iha Dili laran, nune’e planu kontinua monta iha territóriu tomak.
Investimentu ne’e envolve husi empreza lokál rua mak Ceslink operadór ba telekomunikasaun, Oka-D’tel hanesan na’in ba investidór. Ne’ebé, planu ba infraestrutura ho prazu tinan haat, maibé operadór ne’e aselera sei finaliza tinan rua nia laran kobre territóriu tomak.
Emprezáriu ne’e dehan, dadus ne’ebé Ceslink atu implementa mak 4G, nune’e kobre hotu iha territóriu tomak. Tanba ne’e, Ceslink prontu koopera ho Estadu atu kontribui liña telekomunikasaun no teknolojia ba sidadaun.
