“Ami preokupa tebes mak orsamentu ba funsionamentu mákina Estadu nian, tanba iha fulan Jullu nia laran ita laiha ona. Osan atu selu de’it saláriu funsionáriu públiku nian mós difisil ona”, dehan Prezidente PN, Arão Noe de Jesus, iha nia knaar fatin, Sesta (6/7).
Nia hatete, tuir informasaun ne’ebé hetan, fulan ne’e nia laran no ba oin Estadu ne’e laiha ona osan, tanba governu kuaze fulan 9 nia laran ona moris ho orsamentu duadesimu hodi funsiona mákina Estadu.
Atu estadu labele moris nafatin ho osan duadesimu governu tenke lori ona programa no orsamentu mai, nune’e bele halo ona diskusaun hodi halo aprovasaun.
Tenke Aselera Pose Etapa Daruak
Iha loron 22 Juñu, Presidente Repúblika fó pose etapa dahuluk nian ba membru VIII governu 28. Tanba ne’e, presiza atu aselera lalais pose ba segunda faze nian hodi bele aselera lalais prosesu dezenvolvimentu iha rai laran.
Observadór Polítika, Camilo Ximenes hatete, VIII governu entra vigor ona, maibé estrutura ne’e inkompleta tanba membru governu 11 ne’ebé PR rejeita no haruka fila ba PM atu substitui.
Prosesu ne’e la’o atu tama ona ba semana rua, maibé bainhira mak atu iha fali pose etapa daruak nian seidauk iha informasaun. Ne’e duni, di'ak liu Xefe Estadu ho Xefe Governu tenke halo lalais diálogu atu nasaun ne’e bele ultrapasa ona husi situasaun ne’e.
“Pose daruak ne’e tarde sei fó impaktu ba bem estar povu nian. Tanba ne’e, ha’u hanoin sira tenke aselera prosesu ne’e”, dehan Camilo, iha nia servisu fatin, foin lalais ne’e.
Iha mundu, nasaun ne’ebé moris ho osan duadesimu lori fulan naruk ne’e parese Timor karik, tuir informasaun ne’ebé iha utilizasaun ba osan ne’e mós sei termina iha fulan Setembru.
Agora daudaun tama ona ba fulan Jullu, loloos prosesu ne’e tenke aselera ona tanba karik Prezidente Repúblika mantein nafatin rejeita lista membru governu hirak ne’e, responsabilidade lideransa AMP hanesan Xanana Gusmão, Taur Matan Ruak no Naimori Bukar trenke atu buka dalan substitui ona.
Iha fatin ketak, Presidente Parlamentu Nasionál, Arão Noe de Jesus hatete, Estadu ne’e labele moris ho orsamentu duadesimu, ne’e la'ós depende de’it ba PN maibé mós ba órgaun soberania seluk, tanba tuir informasaun governu prepara ona programa atu mai aprezenta maibé hein hela membru governu sira seluk.
Kuandu membru governu 13 ne’e mak simu hotu ona pose fiar katak governu lori daudaun ona programa mai debate, kuandu remata kontinua ho Orsamentu Jerál Estadu (OJE) hodi halo aprovasaun atu bele halo ona dezenvolvimentu nasionál.
