Diretór Ezekutivu Camara Comersiu Industria Timor Leste (CCI-TL), Nuno Trindade, informa ikus-ikus ne’e empreza balun hahú hapara ona sira-nia atividade negosiu tanba kestaun finanseiru ne’ebé labele atu rezolve

Nia hatutan, empreza balun hahú hapara ona sira-nia  traballadór no balun hapara ona sira nia atividade negosiu.

Ida ne’e, nia dehan, mosu tanba impaktu husi situasaun politika ne’ebé lao iha rai laran.

Krize finanseiru iha empreza sira ne’e mosu tanba mós governu seidauk halo pagamentu ba projetu hirak ne’ebé sira implementa.

“Ita-nia emprezariu balun tenke hapara duni sira-nia atividade no balun hapara ona sira-nia traballador tanba osan laiha atu selu, no investor internasional balun mós hahú fila ona ba sira-nia rai tanba de’it situasaun iha Timor Leste la’o seidauk di’ak,” dehan nia ba jornalista sira iha nia knaar fatin, Akait, horsehik.

Tuir nia, investor barak mak hakarak atu mai investe iha Timor Leste, maibé situasaun politika mak impede sira.

Tan ne’e, nia husu ba lideransa sira atu hakotu lalais impasse politika nune’e bele hahú tau atensaun ba prosesu dezenvolvimentu nasaun nian.

Iha fatin ketak, Dekanu Fakuldade Ekonomia, UNTL, Fernando Anuno hatete, roda ekonomia rai laran kuaze tinan rua ona lao ladun estavel.

Ida ne’e, nia hatutan, mós fó implikasaun boot ba nasaun no hamenus rendimentu ba kofre estadu.

“Ita haree agora dadaun investór sira ne’ebé antes ne’e iha ona hanoin hakarak atu mai investe maibé tanba de’it ita-nia poliika rai laran seidauk rezolve halo ema dada aan,” katak nia.

Tuir nia, daudauk ne’e kompaña media balun mós taka ona tanba enfrenta problema finanseiru.

Tan ne’e, nia husu ba lideransa sira atu tuur hamutuk ho ulun malirin hodi salva lalais nasaun ida ne’e husi krize politika.