Sexta, 06 Dezembru 2019 | Login
Ilustrasaun Deve HVS. FOTO: Kompas.com Ilustrasaun Deve HVS. FOTO: Kompas.com

Osan Laiha Eskola Darulau Deve HVS Featured

DILI: Durante impase polítika rai laran, iha tinan rua nia laran Ministériu Edukasaun hasoru difikuldade ba orsamentu konsesaun eskolár, obriga Eskola Ensinu Báziku Sentrál (EBS) Darulau, deve sura-tahan HVS hodi fó ezame ba estudante sira.

Diretór Eskola EBS Darulau, Suku Bekora, Manuel Soares da Silva hateten, orsamentu ba konsesaun eskolár durante ne’e laiha, nune’e sira tenke deve sura-tahan hodi halo aprendizajen ba estudante sira husi segundu períodu tama to’o iha ezame nasionál.

“Sura-tahan deve iha segundu períodu ne’e barak ona atu prevé ba ezame nasionál tanba laiha osan atu sosa”, dehan nia, iha servisu fatin, Darulau-Bekora, horisehik.

Hataan ba preokupasaun ne’e, Ministra Edukasaun Juventude no Desportu (MEJD), Dulce de Jesus hateten, situasaun ne’e sempre akontese, nune’e governu sei tau atensaun hodi haree osan konsesaun eskolár atu eskola sira bele jere ba sira-nia orsamentu.

“Mezmu sira hasoru problema maibé sira halo jestaun di'ak. Ohin bele tama to’o ezame nasionál”, tenik nia, bainhira lansa ezame nasionál, iha EBS Darulau.

Nia hatutan, osan ba konsesaun eskolár ne’e sura ba númeru alunu ida sei hetan $1 kada fulan.

Tuir planu, iha semana rua nia laran sei haruka osan ba eskola sira bele selu dívida ne’ebé antes sira foti ona, no balun bele halo jestaun hadi'a eskola sira.

Jeralmente osan ne’e boot, maibé ba eskola idak-idak osan ne’e ki’ik, oinsá atu apoiu sira halo saida mak sira presiza hodi halo jestaun ba sira nia eskola.

Nune’e, Governu sei halo tuir lei baze edukasaun nian ne’ebé hateten ona, hodi sira bele uza osan ba nesesidade saida mak sira presiza.

Bainhira akontese buat ruma hanesan dezastre naturais, eskola labele hein husi ministériu edukasaun, maibé bele uza osan ne’ebé iha atu labele dependénsia ba governu.

Read 3229 times
Rate this item
(0 votes)
MidAd1