Sábadu, 21 Setembru 2019 | Login
Uma Fukun Parlamentu Nasional.FOTO: espesial Uma Fukun Parlamentu Nasional.FOTO: espesial

Uma Fukun Fatin ‘Salva’ Kriminozu? Featured

Vontade instituisaun judisiariu atu kombate kazu pratika korrupsaun hatudu nafatin sinal pozitivu. Ema lubuk ida ne’ebé identifika envolve mal gastu, abuzu poder no pratika korrupasaun konsege hetan kondenasaun husi Tribunal, maibe iha sorin seluk ema balun mós hetan oportunidade hodi halai ba rai li’ur.

Issue ikus liu iha Timor-Leste maka Sekretariu Jeral Partidu Congresso Nacional Reconstrução Timor-Leste (CNRT), Francisco Kalbuadi Lay, ne’ebé hetan notifikasaun husi Ministeriu Publiku (MP) atu presta deklarasaun. Francisco Kalbuadi, deskonfia envolve kazu brankamentu kapitais hodi fó suporta orsamentu ba Partidu CNRT iha eleisaun parlamentar 2012.

Maski nune’e, eis-Ministru Turizmu ne’ebé lori ona estatutu nu’udar arguidu ne’e halo tentativa nafatin hodi sees. Prokuradoria Jeral haruka notifikasaun dala tolu maibe lakohi kumpre.

Hafoin Tribunal hasai mandadu kapturasaun Kalbuadi ‘finje’ moras hodi ba halo tratamentu saude iha rai li’ur, maibe fizikamente laiha sinal ne’ebé hatudu nia hetan moras hafoin fila mai Timor.

Senariu politika ‘subar’ iha Parlamentu Nasional laran hodi hetan imunidade la’o perante Kalbuadi hela iha estranjeiru. Hafoin to’o iha Timor-Leste, Sabadu (23/2), iha loron Segunda (25/2), retoma hikas funsaun nu’udar deputadu.

Sai perguta boot maka ne’e, tanba saida durante fulan ualu nia laran la hala’o funsaun nu’udar deputadu, maibe husu atu remota funsaun hafoin hetan notifikasaun husi MP? Tanbasa la husu rezignasaun husi lista kandidatura membru Governu antes atu asume kargu deputadu? Hanesan ezemplu balun ne’ebé Antonio Verdial kandidatu Ministru Interior, halo bainhira fila ba PN.

Konxientemente Kalbuadi hatene katak bainhira hela liur nia sei ‘la seguru’, tanba ne’e husu atu tama fali Parlamentu Nasional lalais, tanba Konstituisaun RDTL fó dalan atu deputadu sira bele hetan imunidade.

Lisaun hatudu ona katak deputadu balun bainhira hetan notifikasaun husi Tribunal difisil atu hasai ninia imunidade. Foin deputadu na’in rua de’it maka ninia imunidade hasai tanba konxiensia husi na’in rasik hanesan Mariano Assanami Sabino no Antonio da Conceição.

Bainhira haree ba situasaun ne’ebé Kalbuadi halo daudaun ne’e bele loke presedente ba futuru, bainhira ema ruma envolve  krime sei tenta atu buka imunidade husi instituisaun Estadu sira ne’e.

Partidu politiku sei lori perigu ba sistema judisiariu Timor-Leste no laiha senseriedade atu konribui ba justisa. Nune’e, sei halakon espiritu servisu instituisaun judisiariu sira nian hodi kombate krime korrupsaun iha nasaun ne’e.

Maski nune’e, ita hotu hein katak Francisco Kalbuadi Lay no Partidu CNRT rasik sei hatudu fuan boot hodi kontribui ba justisa liu husi hasai imunidade deputadu ne’e nian. Ita Hein

Read 1985 times
Rate this item
(0 votes)