Artista Dangdut Academy Asian (DAA) 2, Marvi, ho haraik an husu ba facebooker tomak atu para ona hasai lia-fuan negativu ba Dora ho Lola.

Tuir nia, informasaun ne’ebé sirkula katak Dora ho Lola la gosta Marvi, ne’e informasaun ne’ebé la loos.

“Ha’u husu no haraik an ba juventude Timor laran tomak katak favor ida labele hasai lia-fuan ne’ebé negativu ba Lola ho Dora. Ami kolega di’ak. Imi rona informasaun ne’ebé (dehan) Lola ho Dora la gosta ha’u ne’e gosip de’it,” dehan Maria Vitoria liu husi konfrensia imprensa iha Hotel Novo Turismo, Domingu (8/1).

Tan ne’e, nia husu ba públiku tomak atu labele hakerek lia-fuan soran liu husi rede sosial.

“Informasaun ne’ebé mak (dehan) ami na’in tolu (Marvi, Lola, Dora) haree malu la di’ak, ne’e informasaun ne’ebé la loos,” nia afirma.

Aleinde ne’e, Marvi klarifika mós kona-ba informasaun katak artista senior Anito Matos hili de’it Lola no Dora no artista sira seluk iha selesaun DAA 2 nudar informasaun falsu.

“Balu dehan Maun Anito Matos hili malu, ne’e la loos. Ami na’in tolu ne’e unidade, tanba ne’e husu boot ba facebooker sira, labele hakerek tan lia-fuan ne’ebé la di’ak. Para ona iha ne’e. Husu no haraik an ba facebooker sira labele hanoin negativu ba artista see de’it,” katak nia.