Tersa, 10 Dezembru 2019 | Login
Inan  ho Oan Inan ho Oan

Ezije Responsabilidade Pedasuk husi Aman Featured

IHA loron ne’eba, nia hakat sai husi uma. Nia karik haluha iha matan hirak ne’ebé hakarak tebes atu haree nia hakat fila mai uma. Hirus nia ne’ebé nakar, kous nia ne’ebé manya, hakoak nia ne’ebé laran susar.

Iha tinan 2011, bolu de’it Alfo (la’os naran loos) deside hodi harii uma-kain ho Nata (la’os naran loos). Buat hotu la’o di’ak no ksolok. Sira-nia moris sai kompletu liu tan ho prezensa oan na’in rua iha sira-nia leet.

Maibé buat hotu nakfilak. Iha tinan 2014 Alfo husik Nata ho nia oan na’in rua. La’os atu ba rai dook ka mate. Maibé, tanba hakarak atu hola fali feto seluk.

Durante Alfo husik hela nia familia kiik ne’e, moris sai defisil tebes. Nata ne’ebé laiha serbisu, tenke toma responsabilidade ba nia oan ne’ebé hahú boot ba bebeik. Tinan rua ona Alfo husik ninia responsabilidade ba nia feen no nia oan na’in rua.

Atu hetan responsabilidade husi aman no laen ne’ebé lakon hodi ba moris hamutuk ho feto seluk, Nata deside hodi hakat tuir dalan justisa nian. Nia hato’o keixa ba autoridade kompetente no ikus mai ninia kazu to’o iha prosesu julgamentu iha Tribunal Distrital Dili (TDD).

Iha audensia julgamentu ne’ebé hala’o iha TDD, Segunda (24/04), Ministériu Públiku akuza arguidu (Alfa) sai hanesan autór ba krime obrigasaun alimentar ne’ebé previstu iha artigu 225 Kodigu Penal Timor-Leste (KP-TL) ne’ebé hatete “Ema ne’ebé iha obrigasaun atu fó alimentar no iha kondisaun atu halo tuir obrigasaun ne’e, maibé la halo tuir obrigasaun ne’e to’o hamosu perigu ba alimentandu atu laiha meiu ida hodi satisfas nia nesesidade fundamental, maske ema seluk nia ajuda hado’ok tiha husi perigu ne’e, sei hetan pena prizaun to’o tinan tolu (3) ka multa”.

Tuir akuzasaun husi MP ne’ebé Tribunál lee sai katak, arguidu ho lezada moris hamtuk iha tinan 2011 no iha oan nain rua. Iha tinan 2014 arguidu ba hola feto seluk iha Munisipiu Vikeke.

Hatan ba akuzasaun ne’e, arguidu rekoñese katak faktus ne’e loos hotu. Durante ne’e nia la tau-matan duni ba lezada ho oan na’in rua.

“Ha’u prontu atu tau-matan ba sira-nia nesesidade lorloron nune’e mós ha’u sei loke sira-nia konta bankaria, kada fulan tau (osan) iha ne’eba,” arguidu promete.

Ba lezada (Nata), nia la husu atu Alfo fila-fali ba nia nudar nia laen, maibé hakarak atu Alfo hatudu ninia responsabilidade ba sira-nia oan.

“Ha’u la presiza nia atu fila mai ha’u maibé nia tenke tau-matan ba ha’u-nia oan nain rua ne’e,” hatete lezada ba Tribunál.

Liu husi alegasaun, MP husu ba Tribunal atu arguidu bele sustenta labarik sira lor-loron no kada fulan arguidu tenke lori osan $50.00 hodi entrega iha Tribunal hafoin lezada mai foti. Entretantu, defeza husi arguidu konkorda ho deklarasaun husi MP.

Nata ho nia oan na’in rua karik bele dada is ona, tanba hetan ona responsabilidade husi Aman ne’ebé durante tinan rua halai husi ninia responsabilidade. 

Read 763 times
Rate this item
(0 votes)

About Author