PD-FRETILIN Lori Programa Governu Ba Kampaña Featured

By INDEPENDENTE Fevereiru 01, 2018 1539
Alkatiri hp Assanami Alkatiri hp Assanami

DILI: Hasoru kampaña Eleisaun Antesipada (EA), bloku koligasaun Partidu FRETILIN no Partidu Demokrátiku (PD) sei lori programa Governu nu'udar matéria aprezenta ba eleitór sira.

Membru Komisaun Polítika Nasionál PD, Adriano do Nascimento hatete, sira sei lori matéria kampaña ba eleisaun antesipada maka programa Governu ne’ebé hetan rejeisaun husi deputadu bloku opozisaun Aliansa Maioria Parlamentár (AMP) sira.

Programa ne’e nu’udar matéria kampaña mai ami PD ho FRETILIN iha kompromisu polítika ba kampaña nian”, dehan nia, iha Palásiu Governu, horisehik.

Nia dehan, to’o oras ne’e koligasaun PD-FRETILIN kontinua la'o hamutuk, bainhira Prezidente Repúblika dekreta ona loron ba eleisaun antesipada mak lider partidu rua ne’e tuur hamutuk foti desizaun ba prosesu kampaña atu hasoru eleisaun.

PD rasik seidauk foti desizaun fiksu atu la'o hamutuk ho FRETILIN ka láe, tanba partidu ne’e sei halo enkontru ho membru Komisaun Nasionál Polítika PD atu foti desizaun ba prosesu tuir mai.

Adriano dehan, bainhira koligasaun antes konserteza tenke la'o hamutuk, maibé la halo koligasaun mak partidu rua ne’e ida-idak la'o halo kampaña ho matéria kampaña maka programa Governu.

Ne’e duni, PD nia aliadu FRETILIN fiar-aan kompete ho partidu seluk iha eleisaun antesipada, tanba lider partidu rua ne’e iha esperiénsia ba ukun nasaun no oinsá dada dezenvolve nasaun liu husi programa Governu koligasaun nian. 

Rate this item
(0 votes)

Independente Digital TV