Tersa, 12 Novembru 2019 | Login
Prezidente Parlamentu Nasionál, Arão Noe. FOTO: dok Prezidente Parlamentu Nasionál, Arão Noe. FOTO: dok

Dada-malu iha PN ba Prosesu Pagamentu Asaun ConocoPhillips Featured

DILI: Prosesu pagamentu ba asaun ConocoPhillips ne’ebé tuir planu sei halo iha fulan Marsu nia rohan hamosu “dada-malu” iha Parlamentu Nasionál. Deputadu husi opozisaun sira husu atu hapara lai prosesu pagamentu, enkuantu Prezidente Parlamentu Nasionál hakarak atu prosesu ne’e lalais.

Iha Tersa (19/03), Tribunal Rekursu hato’o notifikasaun ba Parlamentu Nasionál relasiona ho rekerimentu husi deputadu rekerente hasoru desizaun TR ba LAP ne’ebé haruka ba PN iha Segunda (11/03).

TR fó prazu loron lima ba PN atu responde ba ninia notifikasaun, maibé PN aselera lalais no iha loron tolu de’it, iha Sesta (23/03), PN hato’o ona ninia resposta ba TR.

“Ami hatan ona notifikasaun TR nian iha loron Sesta (23/3) loraik no TR sei iha loron lima atu deside, ami hakarak prosesu ne’e tenke lalais ba asuntu interese estadu nian ne’ebé atu halo akijasaun ba asaun ConocoPhillips no Sell”, deklara Prezidente Parlamentu Nasionál, Arão Noe ba jornalista sira iha PN, Sesta (23/03).

Arão dehan, PN esforsu maka’as atu responde, maske TR fó prazu loron lima maibé PN lori de’it loron tolu hodi responde, tanba governu presiza desizaun ida ne’ebé lalais, atu nune’e governu bele halo ona ezekusaun ba pagamentu.

Maski alterasaun LAP ne’e sei iha hela prosesu rekursu ne’ebé sei husu hela aklarasaun no desizaun ne’e seidauk finál, maibé, Arão dehan, lei ne’e sei vale hela no governu bele ezekuta.

Tuir Prezidente PN ne’e,  governu liu husi Ministra Finansas (MF) aprezenta ona prosesu pagamentu ba asaun ConocoPhillips nian, tanba ne’e PN informadu ona ba asuntu ida ne’e.

“Ministra Finansas naton ne’e mai aprezenta ona prosesu polílitika ne’ebé atu introdus, ami iha ona koñesimentu, falta de’it prosesu administrativu balun atu halo ona akijasaun”, dehan nia.

Nia dehan, bainhira governu la halo pagamentu iha loron ikus fulan Marsu, hakarak ka lakohi governu tenke selu multa bazeia ba kontratu ne’ebé parte rua estabelise ona.

Iha fatin hanesan, Vise Prezidente Bankada RETILIN, Francisco Branco hatete, deputadu rekerente sira hatama ona reklamasaun ba TR bazeia ba kodiku prosesu sivíl.

“Ami mós simu fali ona notifikasaun ida husi TR kona-ba kestaun sira ne’ebé PN foti no iha prazu loron lima nia laran ami sei responde”, dehan nia.

Bankada FRETILIN mós husu atu hapara lai prosesu pagamentu ba asaun ConocoPhillips hodi hein desizaun husi Tribunal nian.

Read 2545 times
Rate this item
(0 votes)