CNRT sei Kontinua FALBO Featured

By Jacinto Xavier Fevereiru 02, 2018 1250
CNRT CNRT

DILI:Eleisaun parlamentár 2017, hatudu votu partidu Congresso Nacional Reconstrução Timor-Leste (CNRT) derrota kadeira ualu (8) iha Parlamentu Nasionál. Maski nune’e, rezultadu ne’e sei la halakon espíritu partidu ne’e atu kontinua fiar aan la'o ba oin (FALBO), iha eleisaun antesipada.

Prezidente Bankada CNRT, Arão Noe de Jesus hatete, partidu CNRT dezde uluk sempre fiar aan la’o mesak, maibé ho desizaun Prezidente Repúblika nian ne'ebé indijita fali primeiru ministru husi partidu koligasaun minoria, entaun hamosu inserteza polítika naruk.

Haree ba konjuntura polítika ne'ebé la’o runguranga husi desizaun PR nian ne'ebé sempre kontra rejimentu no konstituisaun entaun haree katak atu tau interese nasionál iha leten tenke hasai egoízmu partidu polítiku nian.

Hakarak la’o hamutuk ho partidu polítiku aliadu sira hodi tau estadu ne’e iha nia fatin tuir regra konstitusionál. Tanba ne’e, partidu CNRT deside ba hamutuk ho partidu PLP no KHUNTO.

Partidu tolu hanoin katak atu deside inserteza polítika ne’e VIII Governu agora mai partidu ida tenke manan maioria kualifikada hodi bele garantia funsionamentu Estadu ne’e ba oin.

La'ós arrogánsia partidu ida-idak nian hakarak la’o mesak, maibé hakarak tau interese nasionál iha leten hodi halibur partidu polítiku sira atu bele la’o tuir orden públiku, liuliu konstituisaun ho lei sira ne’e tau fali iha nia fatin.

“Ha'u fiar katak iha eleisaun ne’e ami sei manan maioria kualifikada”, dehan Arão, iha Uma Fukun PN, horisehik.

Iha kampaña ba eleisaun antesipada ne’e, garante katak Xanana Gusmão sei tuun direta nu’udar prezidente partidu CNRT no lider másimu bloku AMP. 

Rate this item
(0 votes)

Independente Digital TV