Tersa, 10 Dezembru 2019 | Login
Ilustrasaun Baku Malu Ilustrasaun Baku Malu

Taka Festa, “Hafuhu” Fila Baku Festa-nain Featured

ORAS hatudu ona tuku 3.00 madrugada. Festa-nain, Frander Lopez, deside hodi taka ‘serimonia’ dansa ne’ebé namanas hela. Maibé, menutu balun hafoin desizaun ne’e tuun, festa-nain ne’e hetan baku.

Iha 22 Janeiru, Frander realiza ‘festa kiik’ hodi selebra ninia aniversariu ne’ebé monu iha loron ne’e.

Hafoin haan hamutuk ho familia no konvidadu sira, hanesan baibain hahú tama iha serimonia ‘dulas-ain, dulas liman’ ka dansa ne’ebé la’o to’o tuku kalan boot.

Iha tuku 1.00 madrugada, Natalino da Costa Wea ne’ebé lori nia kolega balun tama ba festa laran.

Maske la hetan konvite husi festa-nain, maibé Natalino ho fiar an la’o ba, no festa-nain mós hatudu nia laran-luak hodi husu ba Natalino ho nia kolega sira atu ba haan molok dansa.

Hafoin haan, Natalino ho nia kolega sira mós hahú dansa. Maibé, iha tuku 3.00 madrugada, festa-nain deside hodi taka festa.

Natalino ho nia kolega no konvidadu sira seluk fahe malu hodi fila ba idaidak nia uma.

Maibé, la kleur de’it Natalino fila fali mai fatin serimonia no hahú ameasa festa-nain. La to’o ne’e de’it, Natalino mós tuku Frander iha parte hasan.

“Arguidu (Natalino) ho nia kolega sira tama ba festa laran sein konvida husi lezadu, maibé lezadu mós fó haan tiha, sira mós dansa to’o tuku 3.00 madrugada,” deklara Ministériu Públiku iha ninia akuzasaun iha sala julgamentu Tribunal Munisipiu Dili (TMD), Kuarta (03/07).

MP hatutan, bainhira lezadu taka festa, arguidu ne’ebé fila ona ba uma fila fali mai iha fatin serimonia hodi ameasa no tuku lezadu nia hasan.

“Konsekuensia husi arguidu nia hahalok ne’e halo lezadu hetan moras iha fatin atinjidu,” katak MP.

Ho hahalok ne’e, MP akuza arguidu hanesan ko-autor materia ba krime ofensas integridade fiziku simples ne’ebé previstu iha artigu 145 kodigu penal.

Maske nune’e, kazu ne’e la konsege kontinua ba oin tanba molok audensia julgamentu juiz husu ba lezadu atu halo tentativa konsolidasaun tuir artigu 262 kodigu penal.

“Banhira lezadu ida ka lezada ida atu dada fali krime ne’ebé akuza ba arguidu nia bele dada tanba krime ne’e semi públiku, lei fó dalan,” deklara juiz.

Lezadu mós hatan no hakarak dada fali keixa ne’e tanba arguidu ho lezadu mós di’ak malu ona no sira rezolve ona tuir dalan familiar.

Ho desizaun husi lezadu ne’e, tribunál omologa arguidu husi instansia krime ne’ebé kauza ba nia. Enkuantu, MP no defensór konkorda ho desizaun husi lezadu.

Read 1595 times
Rate this item
(1 Vote)