Polisia sei Kaer Autór Hakerek "Xanana" iha Moru-Lolon Featured

By Domingos Gomes Fevereiru 18, 2020 2943
Ema Dezkoñesidu espresa ninia sentimentu ba Prezidente CNRT Kay Rala Xanana Gusmão iha fatin ne'ebé la merese. Iha imajen ne'e, ema dezkoñesidu hakerek "Viva Xanana, Love" iha relojiu boot LOTTE iha palasiu governu nia oin, Segunda (17/02). FOTO: INDEPENDENTE/Jonio da Costa Ema Dezkoñesidu espresa ninia sentimentu ba Prezidente CNRT Kay Rala Xanana Gusmão iha fatin ne'ebé la merese. Iha imajen ne'e, ema dezkoñesidu hakerek "Viva Xanana, Love" iha relojiu boot LOTTE iha palasiu governu nia oin, Segunda (17/02). FOTO: INDEPENDENTE/Jonio da Costa

DILI: Ema balun hahú "liman katar" hodi hakerek iha moru-lolon besik palasiu governu. Maske lia-fuan ne'e la'os lia-fuan tolok, maibé polisia kontinua halo asaun hodi buka tuir autór ne'ebé hakerek lia-fuan ne'e.

Lia-fuan hirak ne'ebé ema dezkoñesidu hakerek nu'udar espresaun husi sira-nia sentimentu ba lider karismatiku Kay Rala Xanana Gusmão, maibé la di'ak tanba hakerek iha fatin ne'ebé la merese.

Tuir observasaun jornalista Jornal INDEPENDENTE, iha fatin rua mak ema dezkoñesidu hakerek. Fatin dahuluk mak iha relojiu boot LOTTE nia okos no iha moru-lolon Kaza Europeia.

Iha relojio boot LOTTE nia okos hakerek ho espidol mean no metan "Viva Xanana, Love" no iha moru-lolon Kaza Europeia hakerek "Viva Xanana, Love U Xanana, no "Avo Nana Sempre iha Ami Nia Fuan".

Polisia Nasionál Timor Leste (PNTL) halo kedan asaun. Komando Jeral PNTL fó ona orientasaun ba komandante polisia operasaun atu buka tuir autór ne'ebé hakerek lia-fuan hirak ne'e.

“Ema ne’ebé hakerek lider istoriku, Maun Boot Kay Rala Xanana Gusmão nia naran iha parede, ita fó ona orientasaun liu husi komandu opersaun PNTL atu haree situasaun sira ne’e, tanba iha parte balun ita konsidera ema uza aktus ida ba ajeitasaun,” deklara Komandante Jeral Polisia Nasionál Timor Leste (PNTL) Komisariu Faustino da Costa hafoin enkontru ho estrutura komandu Polisia iha Kuartel Jeral PNTL, Kaikoli, Segunda 17/02).

Kona-ba atu hamoos parede ne'ebé ema dezkoñesidu hakerek, Komisariu Faustino dehan, nia parte sei koalia ho entidade relevante oinsa atu bele hamoos.

“Iha pasadu ami haree ró ida tau lider sira-nia naran depois iha diskusaun mak ami bele haree atu hamoos," dehan nia.

Entretantu, Deputada Bankada FRETILIN iha Parlamentu Nasionál Nelia Menezes liu husi plenaria husu ba ministériu kompetente no parte seguransa atu haree ba fatin sira ne'ebé ema balun hakerek hanesan iha palasiu governu nia sorin no fatin seluk tan.

“Ita mós hatene katak CCTV PNTL nian iha tanba ne’e husu atu PNTL atu loke CCTV atu haree see mak sai autor ba hakerek parede sira ne’e, se ita haree hetan ema sira hanesan ne’e favor labele tolera tanba hahalok sira ne’e la di'ak,” dehan deputada ne'e.

Rate this item
(0 votes)

Independente Digital TV