Sexta, 06 Dezembru 2019 | Login
Parlamentu Nasional Parlamentu Nasional

PN Hahú Levanta Imunidade Deputadu Leandro Featured

DILI: Parlamentu Nasionál liu husi Komisaun A hahú halo levantamentu imunidade ba Deputadu Bankada Partidu Congresso Nacional Reconstrução Timor-Leste (CNRT), Leandro Lobato, atu ba hataan iha Tribunál nu’udar arguidu.

Vise-Prezidente Komisaun A, Francisco Vasconcelos hateten, sira diskute no aprova ona relatóriu pareser kona-ba levantamentu imunidade deputadu CNRT nian ne’ebé komete krime iha 2018 liubá, iha Munisípiu Likisá.

Maski Vise-Prezidente Komisaun A PN la esplika klaru krime saida maka deputadu ne’e komete. Maibé, informasaun ne’e diáriu ne’e asesu, Deputadu Leandro komete kazu agresaun fíziku iha Munisípiu Likisá, iha momentu kampaña Eleisaun Antesipada.

Deputadu Francisco dehan, relatóriu ne’e aprova ona hein lori ba lider bankada sira fó apresiasaun no submete ba plenária hodi hasai imunidade deputadu nian, nune’e bele ba tuir julgamentu iha tribunál.

Nia esplika, regra iha PN nian Komisaun A bolu deputadu ne’ebé hetan ona notifikasaun husi tribunál mai iha komisaun hodi rona nia opiniaun relasiona ho notifikasaun ne’e.

“Deputadu Leandro Lobato nia dehan laiha objesaun prontu atu koopera ho justisa,” dehan nia, iha PN, horisehik.

Nia hatutan, durante ne’e PN hasai ona imunidade barak, deputadu balun sai arguidu no balun sai sasin, prosesu ne’e agora la’o iha iha uma fukun ida ne’e.

“Deputadu ne’e sai hanesan arguidu nia komete kazu uma laran, ha’u labele esplika, relatóriu baixa ona hein Presidente PN ajenda, nune’e bele debate ona,” tenik nia.

Deputadu ne’e konsidera kazu ne’e ki'ik, maibé ne’e husik tribunál mak deside sé mak loos no sala. Tanba ne’e, kompeténsia órgaun judisiáriu nian, tuir planu iha semana rua mai tan bele ba tuir ona julgamentu iha Tribunál.

Antes ne’e, Parlamentu Nasionál halo ona levantamentu ba deputadu na’in rua husi Bankada Partidu Demokrátiku (PD), Mariano ‘Assanami’ Sabino no António da Conceição ‘Kalohan’.

Ikus mai, imunidade deputadu na’in rua ne’e hasai no sira ba duni hataan ba justisa tuir pedidu Tribunál nian.  

Read 1491 times Last modified on Sexta, 05 Jullu 2019 17:51
Rate this item
(0 votes)