Sábadu, 21 Setembru 2019 | Login
Bosco nia mate isin oho iha Indonesia Bosco nia mate isin oho iha Indonesia

PM Taur Lamenta ba Bosco Nia Mate Featured

DILI: Primeru Ministru (PM) Taur Matan Ruak sente triste no lamenta tebes ho João Bosco nia mate ne’ebé deskonfia hetan oho husi estudante Timor-oan seluk iha Yogyakarta-Indonezia.

PM Taur husu ba foin-sa’e Timor-oan hotu atu hadomi nia aan no hadomi mós nia maluk sira seluk.

“Ha’u lamentavel tebes ho akontesimetu ne’e, saida mak ha’u bele ko’alia mak apela ba joven sira atu hadomi nia aan, tanba ita mai iha mundu ne’e ita-nia inan-aman sira terus, husik ba Maromak mak hasai ita-nia vida, ita ho ita labele,” dehan PM Taur, iha Palasiu Prezidensiál Bairru-Pité, Kinta (18/07).

Xefe Governu ne’e fó nia observaun katak, joven Timor-oan barak mak iha komportamentu di’ak, maibé joven ida-rua mak hakarak atu hafo’er nasaun nia naran. Maibé hanesan lider, Taur kontinua apela ba joven sira atu hadomi nia aan rasik.

Iha fatik ketak, Prezidente Komisaun B Assuntu Negósiu Estranjeiru Defeza no Seguransa Aderito da Costa hatete, akontesimentu ne’e la’os foin primeira vez akontese iha Indonezia, maibé dala-barak ona. “La’ós foin mak oho malu maibé akontese kedas iha tinan hirak liu bá. ema sira agora laran makerek hodi oho malu nafatin tanba sei lembra esperensia tinan 24 no okupasaun Portugués,” dehan nia iha PN horisehik.

“Kazu Indonezia husik autoridade Indonézia mak bele halo prosesu par bele hetan motivu loos husi oho malu tanba estudante sira ba ho viza Timor nian”.

Molok ne’e Prezidente Konsellu Nasionál Juventude Timor Leste (CNJTL) Maria Dadi Soares Magno, sente triste ho atitude grupu juventude sira ne’ebé kontinua kria violénsia, oho malu no ataka malu, iha rai laran no mós rai li’ur.

“Ita haree kazu ne’ebé akontese iha Jogja-Indonézia, iha Bebonuk nian, no iha Likisá no kazu fatin seluk-seluk ne’ebé akontese lori tristeza boot ida ba Timor-oan sira,” dehan nia iha nia knaar fatin Palapasu, Dili, Kuarta (17/07).

Haree kazu sira ne’e nia husu ba estadu TL tenke foti ona asaun ruma hodi kombate krime sira ne’e no prosesa tuir lei.

Nia dehan, CNJTL hato’o preokupasaun ne’e la’ós atu nega joven sira, maibé hanesan organizasaun ne’ebé sai mahon ba juventude iha responsabilidade moral hofi fó hanoin nafatin ba juventude sira.

Nia apela ba joven sira di'ak liu eduka aan hodi bele kontribui ba dame, liuliu halo serbisu ne’ebé bele fó benefísiu, inklui ba família no sosiedade.

Read 1195 times
Rate this item
(3 votes)