Nia husu ba povu Timor atu lalika ameasa malu, tanba desizaun atu veta ka promulga OJE 2019 ne’e desizaun polítiku sira nian, nune’e sidadaun sira lalika aproveita situasaun ne’e hodi lansa ameasa ba malu.

Lere rona informasaun balun katak, se Prezidente Repúblika veta Timor rahun. Tuir nia, ema ida ne’ebé ko’alia ne’e bosok teen, kobarde no ta'uk teen. Tenke kuidadu bainhira ameasa estabilidade nasionál krime bele autoriza hodi kaer.

“Ha’u rona nia dehan uluk militár ida ne’ebé ofisial dezertór Lospalos nia oan ida, maibé tenke kuidadu labele mai ko’alia ibun boot dehan Timor rahun. Ne’e la'ós fasil. To’o ita halo fera manu tolu ida mós ita sei halo esforsu”, tenik nia, iha Palasiu Prezidensiál Bairru-Pité, Sesta (11/1).

Timor ne’e la'ós kualkér ema maka halo rahun ne’e laiha, só Maromak bele kastigu bele sai nabeen, maibé ema ne’e lalika ameasa malu.

Lere hateten ba Prezidente Repúblika lalika moris iha presaun nia laran. Labele ta'uk presaun ba ema sira ne’ebé halo ameasa.

Ema ne’ebé ameasa ne’e, tuir nia, bele matenek to’o iha ne’ebé mós kaer no futu hatama karreta soe ba kadeia, tanba ema ne’e lakohi Timor hakmatek.

“Mane tau iha oin para ita haree, maibé ameasa de’it ne’e hanesan asu ida karik hatenu de’it maibé sei la tata”, tenik nia.

Ba pozisaun forsa no seguransa nian, Xefe Estadu Maiór Jenerál F-FDTL, hateten, ne’e problema polítiku no órgaun kompeténsia sira nian, tanba ne’e forsa armada no PNTL laiha buat ida atu tama ba área ne’e, sira nia devér no obrigasaun maka seguransa.