Sábadu, 21 Setembru 2019 | Login
Marina buka hela labarik kaduak ne'ebe mout iha tasi lecidere, Dili Marina buka hela labarik kaduak ne'ebe mout iha tasi lecidere, Dili

Labarik Kaduak Mout iha Tasi Largo, Ida Mate Featured

DILI: Labarik na’in rua ho idade tinan 11 ne’ebé mós nu’udar kaduak mout iha tasi area Largo Lecidere bainhira ba hariis tasi ho nia kolega sira iha Kinta (18/07) loraik.

Labarik kaduak ne’ebé identifika ho naran Dario no Danio ne’e sai husi sira-nia hela-fatin iha Bidau Masaur, Postu Administrativu Vera Kruz, Munisipiu Dili iha tuku 14.00 loraik.

Hafoin, labarik na’in rua ne’e hamutuk ho nia kolega sira la’o halimar ba Largo Lecidere no ikus mai ba hariis tasi. Bainhira sira sei hariis hela, teki-teki kaduak ne’e mout iha tasi laran. Labarik hirak seluk halai sai no hakilar hodi husu ajuda.

Joven ida ne’ebé nu’udar mós jogadór Ponta Leste halai lalais ba tasi laran no konsege salva Danio. Nia koko mós atu salva Dario, maibé tanba anin no laloran boot no tasi merak difikulta nia atu bele hetan Dario nia isin.

“Ha’u tuur iha tasi ibun Maizumenus tuku rua (2). Labarik sira hariis hela, derepente labarik balun halai sai mai hodi husu ajuda. Ha’u haree labarik ida mout hela, nia liman mak sai. Ha’u halai tama ba tasi laran hodi salva labarik ne’e. Ha’u tama ba fali ba buka tan labarik ida seluk maibé la hetan ona tanba tasi boot, merak maka’as loos,” dehan Paulo ba jornalista sira iha Largo Lecidere Dili, Kinta (18/07).

Labarik ida, Danio, ne’ebé hetan salva evakua kedan ba Ospital Nasionál Guido Valadares hodi hala’o tratamentu. Hafoin akontesimentu, liu menutu balun Polisia Unidade Maritima (UPM) ho ró buka tuir kedas labarik ida ne’ebé sei iha tasi laran.

Iha tuku 17.00 lokraik, ekipa UPM konsege hetan labarik ne’e, maibé ho kondisaun mate ona. Ekipa Polisia Forensik lori kedas mate-isin ba Ospital Nasional Guido Valadares.

Read 690 times
Rate this item
(0 votes)
MidAd1