Domingu, 05 Abril 2020 | Login
Diretór SERVE Florencio Sanches Diretór SERVE Florencio Sanches

Kompaña 2 Hatama Pedidu ba SERVE atu “Lulun Biti” Featured

DILI: Kompaña rua (2) ne’ebé durante ne’e hala’o atividade iha area otelaria no konstrusaun hato’o pedidu ba Servisu Rejistu no Verifikasaun Emprezarial (SERVE) hodi taka sira-nia kompaña ka “lulun biti”.

Diretór SERVE Florencio Sanches informa, kompaña rua iha area otelaria no konstrusaun hatama ona pedidu hodi  lulun biti tanba husi 2013 to’o 2019 politika governu fó impaktu tebes ba kompaña nia atividade.

“Iha Janeiru tinan ida ne’e nia laran iha emprejariu balun ne’ebé mak hato’o pedidu atu taka, tanba kompaña rasik sofre ona tinan tolu,” dehan Florênsio iha nia knaar fatin, Surikmas, Kuarta (29/01).

Razaun kompaña hakarak taka sira-nia atividade, Florencio dehan, tanba sira hasai osan maibé la hetan lukru.

“(kompaña sira dehan) Ami sofre ba beibeik. Ami selu salariu ba staf, ami selu eletrisidade, maibé ami-nia osan tama ne’e menus tebes,” dehan Diretór SERVE hodi hatutan lia-fuan husi emprezariu sira.

Husi parte SERVE, Florencio dehan, fó nafatin korajen ba kompaña sira atu labele taka sira-nia atividade.

Ho korajen ne’e, nia hatutan, kompaña balun aseita atu taka de’it sira-nia lisensa, la’os sira-nia atividade.

Maibé, Florencio dehan, kompaña sira mós hatete bainhira tinan ne’e mak situasaun nafatin, sira sei taka sira-nia atividade.

Read 473 times
Rate this item
(0 votes)
MidAd1