Komisaun A Konsidera Karta MP ba Kalbuadi La Tuir Dalan Featured

By Tomé Amado Maiu 02, 2019 1011
Presidente Komisaun A Parlamentu Nasional Presidente Komisaun A Parlamentu Nasional

DILI: Komisaun A Parlamentu Nasionál ne’ebé simu notifikasaun husi Ministériu Públiku (MP) relasiona ho kazu deputadu Francisco Kalbuadi Lay konsidera notifikasaun MP la tuir nia dalan.

Iha 18 Marsu liu ba, MP hato’o notifikasaun ba Parlamentu Nasionál (PN) atu autoriza eis Ministru Turizmu no atual deputadu bankada CNRT, Kalbuadi, ba presta deklarasaun iha MP nuudar arguidu.

Iha 22 Marsu, Prezidente Komisaun A Carmelita Moniz asina notifikasaun, maibé to’o ohin loron karta refere seidauk haruka ba plenaria PN atu deskuti.

Deputadu Bankada FRETILIN, Antoninho Bianco husu ba Komisaun A atu klarifika kontiudu husi notifikasaun MP ba deputadu Kalbuadi.

Tanba, deputadu Bianco ne’e hatete, nia haree notifikasaun husi MP dirije ba deputadu Kalbuadi ne’ebé haruka mai PN iha 18 Marsu no baixa ba Komiasaun A.

Deputadu ne’e husu tanba sa mak fulan ida resin ona maibé karta ne'e seidauk hato’o ba plenaria PN.

“Ha’u rona no haree duni karta ne’e MP haruka mai PN iha loron 18 Marsu 2019 no prezidente komisaun A Carlmelita Moniz mak asina iha 22 Marsu 2019,” dehan nia iha plenaria PN, Tersa (30/04).

Ba kestaun ne’e, Vise Prezidente Komisaun A, Francisco de Vasconcelos hatete, komisaun A simu duni notifikasaun husi MP ba Kalbuadi.

Maibé, Komisaun A haree katak notifikasaun ne’e lapsu nune’e Komisaun haruka pareser ba Prezidente PN, Arão Noe, atu esplika kestaun ne’e.

“Ita husu Prezidente PN haruka fali pareser ne’e ba MP tanba kontiudu karta ne’e rasik la tuir ninia dalan,” dehan deputadu ne’e.

Iha fatin hanesan, Prezidente PN Arão Noe afirma, tuir Komisaun A karta ne'e la tuir dalan nune’e Prezidente PN haruka ona pareser ba MP.

“Ha’u haruka fali pareser ba Ministériu Públiku tanba karta ne’e la tuir ninia dalan purenkuantu to’o agora MP seidauk haruka fali karta notifika segundu mai,” dehan Arão.

Entretantu, molok ne’e, Ministériu Publika haruka karta ba Parlamentu Nasionál hodi hasai imunidade Deputadu Partidu CNRT, Francisco Kalbuadi Lay, atu hataan ba prosesu investigasaun, maibé Prezidente Parlamentu Nasionál la ajenda ba plenária.

Ministériu Públiku determina ona loron 4 Abríl 2019 atu Kalbuadi presta deklarasaun maibé la ba tanba PN la konsege hasai deputadu ne’e ninia imunidade.

Prezidente Parlamentu Nasionál, Arão Noe de Jesus hateten, prosesuál ne’e sala tanba karta ne’ebé haruka ba Parlamentu Nasionál ne’e husi Prokuradór Jerál Repúblika, maibé laos prokuradór prosesu maka haruka. Tanba ne’e, korrespondénsia la prienxe ba rekizitu legál.

Rate this item
(0 votes)

Independente Digital TV