Kalbuadi sai Fali Deputadu, Lere: “Polítiku sira La Toma Solusaun, Husu ba Ha’u” Featured

By Cristina Ximenes Marsu 01, 2019 1633
Prezidente Partidu CNRT, Kay Rala Xanana Gusmão konversa ho Sekretáriu Jerál Partidu CNRT, Francisco Kalbuadi Lay iha Aeroportu Komoro Dili. FOTO: Espesiál Prezidente Partidu CNRT, Kay Rala Xanana Gusmão konversa ho Sekretáriu Jerál Partidu CNRT, Francisco Kalbuadi Lay iha Aeroportu Komoro Dili. FOTO: Espesiál

DILI: Polemika kona-ba Sekretariu Jeral partidu CNRT Francisco Kalbuadi Lay ne’ebé ‘tama fali’ ba Parlamentu Nasionál nu’udar deputadu hamosu mós preokupasaun husi Komandante FALINTIL-Forsa Defeza Timor Leste (F-FDTL), Maijor Jeneral Lere Anan Timur.

Tuir Maijor Jeneral Lere, politiku sira tenke buka solusaun hodi rezolve problema ne’e. Maibé, se politiku sira la hatene toma solusaun, Lere  loke an atu politiku sira bele husu nia.

“… Ikus mai Francisco Kalbuadi Lay polísia atu kaer la kaer, agora ba fali Parlamentu Nasionál, tanba ne’e tenke iha solusaun ruma. Se polítiku sira la hatene toma solusaun ruma, husu ba ha’u atu fó solusaun,”deklara Lere hafoin hasoru-malu ho Prezidente Repúblika Francisco Guterres Lu Olo iha Palasiu Prezidensial Bairru-pite, Dili, Kuarta (27/02).

Tuir nia, iha ema balun ne’ebé hahú buka oportunidade no buka lakunas iha lei hodi aproveita.

“Ita hatene katak ohin loron ema barak aproveita oportunidade, ida ne’e mak bolu oportunista,” dehan Lere.

“Ema sira oportunista komesa (aproveita) lakunas iha lei tanba sira matenek,” Xefe Estadu Maior Jeneral F-FDTL ne’e hatutan.

Lere dehan, governu tenke hatene solusiona problema no labele halimar.

“Sira ne’ebé agora hamnasa simu osan ne’e uluk la terus ba nasaun ida ne’e. Ami terus, ami nia familia mate mohu ba nasaun ida ne’e, tanba ne’e nasaun nia aat ne’e ami la hanoin,”deklara Lere.

Komandante F-FDTL ne’e hatutan, Prezidente Repúblika Francisco Guterres Lú Olo no Primeiru Ministru Taur Matan Ruak nu’udar veteranu ne’ebé luta iha ai-laran durante tinan 24, tan ne’e Lere la duvida ba figura rua ne’e, maibé nia duvida ba ema hirak ne’ebé serbisu hamutuk ho sira.

“(Lu Olo ho Taur iha ailaran) to’o katuas tan, la’os tinan ida ka tinan rua, maibé ema sira ne’ebé hale’u sira ne’e mak dala ruma hanoin la loos,” dehan nia.

Rate this item
(0 votes)
Last modified on Domingu, 10 Marsu 2019 18:19

Independente Digital TV