Iha Ona Sinál Remodelasaun Featured

By INDEPENDENTE Maiu 15, 2019 1389
Membru VIII Governu Konstitusional Membru VIII Governu Konstitusional

DILI: Partidu koligasaun Aliansa Mudansa ba Progresu (AMP) sei halo avaliasaun anuál ba servisu Governu nian. Dalan ba remodelasaun bele akontese iha tinan ne’e bazeia ba rezultadu husi avaliasaun ne’ebé sei halo.

Tuir fonte ne’ebé besik partidu CNRT deklara katak, iha semana ne’e nia-laran partidu koligasaun sei halo reuniaun iha nivel AMP nian, ne’ebé sei ajenda mós avaliasaun servisu membru governu sira nian.

Nune’e, iha semana oin sei iha mós enkontru partidu koligasaun nian iha nivel membru Parlamentu Nasionál no Membru Governu sira.

“Tempu badak bele akontese remodelasaun, tanba reuniaun ne’e sei halo mós avaliasaun ba membru governu sira-nia servisu”, dehan fonte ne’e, iha Dili, horisehik.

Tuir nia, baze fundamentál maka oinsá halo avaliasaun ba servisu membru Governu sira nian, nune’e bele halo mudansa tuir duni polítika AMP nian.

Nune’e, fonte seluk ne’ebé besik partidu FRETILIN mós hateten, Comité Central FRETILIN (CCF) iha semana ne’e sei halo reuniaun alarga ho membru sira.

Seidauk klaru ajenda saida maka sei ko’alia iha soru-mutu ne’e, maibé jeralmente sei haree ba polítika partidu FRETILIN nian ba mudansa polítika ne’ebé la’o hela iha rai laran.

Entretantu, Prezidente Bankada CNRT, Duarte Nunes, abertamente deklara katak partidu CNRT konkorda atu halo remodelasaun ba estrutura governu.

Maski nune’e, desizaun hotu-hotu sei foti liuhusi konferénsia nasionál ida hodi define estratéjia polítika partidu nian.

Tanba atu halo remodelasaun ka lae ne’e depende ba desizaun konferensista sira liu husi konferénsia nasionál ne’ebé tuir planu atu halo.

Husi desizaun konferénsia nian maka Komisaun Polítika Nasionál (CPN) partidu CNRT sei aprezenta iha nivel AMP nian hodi deside hamutuk entre partidu koligasaun sira.

Responde kona-ba issue remodelasaun inklui lista Membru Governu sombra ne’ebé espalla iha média sosiál, Duarte deklara la loos. Tanba seidauk iha reuniaun nivel partidu no AMP nian hodi diskute kona-ba remodelasaun.

Tuir lista ne’ebé espalladu, membru Governu hamutuk na’in 39 inklui mós lider antigu sira hanesan Xanana Gusmão, Mari Alkatiri no José Ramos Horta. Iha lista ne’e rasik barak liu husi Partidu CNRT no FRETILIN. Nune’e, laiha envolvimentu husi membru Partidu KHUNTO, no Partidu Libertasaun Populár (PLP) na’in tolu.

Rate this item
(0 votes)
Last modified on Kuarta, 15 Maiu 2019 14:29

Independente Digital TV