Tersa, 12 Novembru 2019 | Login
PR Lu Olo PR Lu Olo

Ema Hotu Hein no Preokupa Desizaun PR Lú Olo ba OJE 2019 Featured

DILI: Orsamentu Jerál Estadu (OJE) tinan fiskál 2019 nian fó iha esperansa boot ba povu atu bele hetan moris di'ak, maibé mós hamosu preokupasaun ba setór balun ne’ebé ladún hetan atensaun másimu.

Bispu Dioseze Dili, Don Virgílio do Carmo hateten, OJE 2019 ne’e sertamente ema hotu hein hela ka presiza ba povu ne’e nia di’ak, maibé preokupa ho alokasaun orsamentu ba área tolu ne’ebé importante.

Área tolu ne’ebé oras ne’e sai sidadaun sira nia preokupasaun maka edukasaun, agrikultura no saúde.

Iha setór edukasaun nian Governu harii eskola barak maibé dala barak sei rona halerik kona-ba edukasaun.

Agrikultura nian sei rona halerik kona-ba númeru dezempregu iha rai laran boot tebe-tebes. Ne'e duni dalan ida atu redús dezempregu maka agrikultura.

Ikus liu maka saúde, dala barak sai hanesan sidadaun sira nia preokupasaun ligadu ho fasilidade saúde ne’ebé sei menus.

Tanba ne’e maka bainhira haree ba orsamentu ne’ebé aloka ba área tolu, liu-liu ba agrikultura ne’ebé montante ki'ik ida ne’e fasil liu ba ita sosa foos duke halo natar”, dehan Don Virgílio, iha Palásiu Prezidensiál Bairru-Pité, horisehik.

Nia dehan, relasiona ho montante OJE ba tinan ne’e aas tebe-tebes depende ba na’i ulun Xefe Estadu atu tetu didi’ak, nune’e bele hataan ba povu ninia di’ak ka tenke iha ekilíbriu ba buat ne’ebé iha no buat ne’ebé gastu.

Nia hatutan, durante enkontru ho Prezidente Repúblika sira la ko'alia veta ka promulga OJE, maibé buat ne’ebé sira sujere maka oinsá orsamentu ne’e bele ajuda fó benefísiu ba povu.

Iha biban ne’e, Prezidente Konsellu Nasionál Izlámika Timor Leste, Haji Ahmad Ali Al-Ayyubi hateten, sira nia prezensa mai konsulta oinsá maka dezenvolve TL ne’ebé di’ak liu ligadu ho OJE 2019.

Ami la ko’alia kona-ba problema veta ka promulga maibé Prezidente Repúblika hakarak hetan opiniaun ka sujestaun ne’ebé di’ak atu bele dezenvolve TL ne’ebé di’ak liu”, tenik nia.

Tanba ne’e, sujestaun katak orsamentu ne’ebé boot hanesan ne’e labele depende de’it rezultadu husi mina-rai, maibé governu presiza harii indústria ruma hanesan fabrika ruma hodi produs produtu hodi hakotu dependénsia sasán importasaun.

Read 104 times
Rate this item
(0 votes)