×

Atenção

JUser: :_load: Não foi possível carregar usuário com ID: 425

Eleitoradu Rejistadu 743.150, La Vota 214.337 Featured

By INDEPENDENTE Marsu 23, 2017 2265
Liman fuan hatudu buat nebe ladiak Liman fuan hatudu buat nebe ladiak

DILI: Partisipasaun populasaun iha eleisaun prezidensiál períodu ne’e tuun kompara ho períodu rua liubá. Husi totál eleitoradu rejistadu 743.150, votante na’in 214.337 ka 28.84% mak la tuir votasaun no na’in 528.813 ka 71,15% mak konsege fó direitu vota.

Persentajen ne’e menus liu kompara ho períodu 2007 ne’ebé no 2012 nian. Iha tinan sanulu ba kotuk partisipasaun eleitoradu atinji to’o 81,79% no tinan lima liubá 78,20%.

Populasaun sira ne’ebé hela iha Dili inklui estudante sira kestiona makaas lei eleitorál ne’ebé obriga ema hotu tenke dezloka ba ida-idak nia munisípiu tuir kartaun eleitorál.

La'ós ne’e de’it, família pasiente sira mós sai ‘vítima’ ba prosesu votasaun ne’ebé la loke dalan ba sira hodi partisipa iha festa demokrasia ne’e.

Prezidente Comissão Nacional Eleições (CNE), Komisáriu Alcino de Assis Barris hateten, ema barak la tuir votasaun tanba laiha posibilidade atu dezloka ba fatin ne'ebé halo resenseamentu ba.

“Tanba regra só bele vota iha fatin ne'ebé halo resenseamentu ba”, dehan nia, iha Otel Timor, horisehik.

Tuir nia, númeru ne’e seidauk atualiza mós ho númeru votante sira ne’ebé oras ne’e daudaun halo hela servisu iha estranjeiru.

Ba oin, Alcino dehan, tenke habelar informasaun ba sidadaun sira antes atu tama ba eleisaun, atu ema hotu bele preparadu ba vota iha ida-idak nia fatin emite kartaun eleitorál.

Entretantu, dosente UNDIL, Francisco Mausoro hateten, tuir loloos Governu tenke halo antesipasaun hodi dezloka estudante sira atu fila ba ida-idak ninia fatin atu bele hola parte iha prosesu ne’e.

“Ne’e fallansu boot Governu nian, tanba la konsege lori ema sira ba vota iha ida-idak nia hela fatin”, tenik nia.

Governu iha vontade di'ak atu fasilita votante iha estranjeiru tuir votasaun, maibé tanba saida mak populasaun barak ne’ebé hela iha Timor la hetan apoiu atu partisipa mós iha votasaun ne’e.

Deputadu PN Konsidera Kulpa Votante

Relasiona populasaun barak ne’ebé la tuir eleisaun prezidensiál, deputadu Parlamentu Nasionál husi bankada CNRT, Arão Noe de Jesus konsidera kulpa sidadaun nian, tanba Governu kria kondisaun hodi atualiza baze dadus atu muda resenseamentu, maibé populasaun sira lakohi tuir.

Nia hatutan, lei eleitorál labele halo altersaun iha tempu badak nia laran, iha posibilidade sei altera iha tinan 2022 ba oin mai.

Oras ne’e, baze dadus eleitoradu nian sei manuál tanba ne’e difisil atu kontrola mosu manipulasaun iha tempu eleisaun.

Atu minimiza situasaun ne’e labele akontese, governu hamutuk ho parlamentu nasionál deside hodi mantein eleitór sira tenke ba suku hodi vota tuir kartaun eleitorál ne'ebé rejistadu.

Hakarak atu vota livre hodi labele hamosu manipulasaun iha eleisaun tenke uza eletróniku, maibé ohin loron seidauk iha kbiit atu bele adopta situasaun ne’e. 

Rate this item
(0 votes)

Independente Digital TV