Alegasaun Final MP: Multa $1 Kada Loron ba Konsultór ADN Featured

By Martinha Gusmão Jullu 05, 2019 4173
Detidu Detidu

DILI: Kazu uza karreta estadu ba interese privadu ne’ebé dada konsultór Ajensia Dezenvolvimentu Nasionál (ADN) tama ona iha tribubal. Liu husi prosesu interogatoriu dahuluk, Ministériu Públiku husu ba tribunal atu aplika pena multa ba konsultór refere.

Liu husi audensia julgamentu ne’ebé hala’o iha Tribunal Munisipal Dili (TMD), Prokurador Rogerio Viegas husu tribunal fó pena multa $1 kada loron durante loron 100 nia laran, no aplika kustu judisiariu ba arguidu ho inisial HPW ho montante $50.00.

MP deklara nia razaun katak, arguidu HPW priense duni element ba krime pekulatu uzu, bazeia ba deklarasaun arguidu ne’ebé rekoñese iha momentu ne’ebá arguidu utuliza karreta sees husi oras serbisu tula nia feen no kolega ba sosa sasan iha supermerkadu.

MP deklara, maske arguidu iha autorizasaun husi ADN atu utiliza karreta estadu ba asuntu privadu no serbisu, maibé iha mós regras ne’ebé determina katak funsionariu ida so bele utiliza karreta estadu ba de’it serbisu instituisaun nian.

Iha fatin hanesan, arguidu nia defensor, Fernando da Costa husu ba Tribunal atu toma konsiderasaun ba arguidu nia prezensa iha Timor Leste ne’ebé atu fó apoiu serbisu ba governu Timor Leste liu husi ADN.

Advogadu ne’e dehan, iha arguidu nia kontratu serbisu hatete katak arguidu bele utuliza karreta ba asuntu privadu no serbisu iha kualker tempu.

“Maibé (kontratu ne’e) la esplika espesifiku kona-ba saida de’it mak nia (arguidu) bele halo no labele halo, tanba ne’e arguidu rasik mós la hatene hahalok ne’ebé nia halo loos ka lae,” defensór ne’e argument iha sala julgamentu TMD, Kuarta (03/07).

Tribunal deside adia julgamentu ba 8 Jullu tuku 16:00 loraik hodi rona desizaun.

Entretantu, molok ne’e tuir informasaun husi Diresaun Nasionál Seguransa Rodavária (DNSR), Ministériu Interior katak, karreta ADN ho matrikula 05-348G ne’ebé prende iha Domingu (30/06), kondus husi konsultór ADN ne’ebé identifika nu’udar sidadaun Indonezia.

Liu husi operasaun konjunta entre Komisaun Anti Korrupsaun (KAK), PNTL, Diresaun Nasionál Transporte Terrestre (DNTT), Diresaun Nasionál Seguransa Rodavária (DNSR), kaptura no detein konsultór ADN ne’e.

Pontu Vokal DNSR, Ministériu Interior, Alípio José Vieira informa, ekipa konjunta kaptura konsultór ADN iha  area Kolmera, tanba utiliza karreta estadu ba interese privadu.

Alípio dehan, bainhira ekipa konjunta halo pasa revista, konsultór refere hatudu duni karta autorizasaun sirkula iha loron Sabadu no Domingu. Maibé ekipa deside hodi kaptura tanba konsultór ne’e la halo serbisu estadu nian.

“Señor ida, ema estranjeiru, husi Indonezia, hanesan konsultór (iha ADN), nian mak lori (karreta) hodi tula nia feen ho oan ba haan,” informa Alípio Jose ba jornalista sira, iha nia knar fatin, Ministériu Interior, Villa Verde, Segunda (01/07).

Nia hatete, lei vale ba ema hotu-hotu, la haree ba nia pozisaun, katak funsionáriu hotu-hotu ne’ebé utiliza patrimóniu estadu tenke kumprimenta regra ne’ebé hatuur ona iha Dekretu Lei Númeru 8/2003, 18 Jullu, kona-ba atribuisaun no utilizasaun karreta estadu.

“Ami nia baze legál mak ida ne’e hodi kaer nia, tanba nia la’os halo atividade estadu nian,  maibé halo atividade privadu, familia nian,” nia afirma.

Rate this item
(0 votes)

Independente Digital TV