Sábadu, 07 Dezembru 2019 | Login
Ministra Finansas Interinu (MF), Sara Lobo Brites Ministra Finansas Interinu (MF), Sara Lobo Brites

Semana Oin Governu Hahú Ezekuta Orsamentu Estadu Featured

DILI: Orsamentu Jerál Estadu (OJE) 2019 montante Biliaun $1.482 promulgadu husi Prezidente Repúblika, semana oin Ministériu Finansas hahú instala iha sistema no kria dekretu ezekusaun orsamentu no aprezenta iha Konsellu Ministru hodi hetan aprovasaun.

Ministra Finansas Interinu (MF), Sara Lobo Brites dehan, ekipa tékniku Ministériu Finansas iha semana ne’e atu prepara dekretu ezekusaun orsamentu ne’ebé sei aprezenta iha konsellu Ministériu.

“Fiar katak iha semana ne’e ami bele konklui no semana oin loke ona ba liña ministériu no instituisaun Estadu sira atu ezekuta sira nia osan”, dehan Sara, iha Palásiu Governu, horisehik.

Nia dehan, orsamentu Estadu sempre aprova ho lei, maibé Governu sei estabelese dekretu ezekusaun atu regula instituisaun Estadu ho liña ministériu sira atu ezekuta sira atu ezekuta orsamentu ho didi’ak.

Sara dehan, dekretu ezekusaun ne’e kada tinan Ministériu Finansas sempre realiza, bainhira ezekuta orsamentu tenke iha jestaun ho kualidade, hodi kria boa governasaun ne’ebé di'ak iha mandatu Governu nian.

Kona-ba Orsamentu Duadesimu tokon $94, Governu sei la utiliza tanba OJE hetan promulgasaun, nune’e orsamentu tokon $94 sei fila ba kofre Estadu.

Estrutura Governu Inkompletu

Iha fatin ketak, Ministru Reforma Lejizlativa Asuntu Parlamentár (MRLAP), Fidelis Magalhães dehan, OJE 2019 promulgadu maibé pose ba kandidatu membru governu pendente seidauk realiza, ne’e duni Governu fiar katak tempu badak estrutura VIII Governu kompletu.

Nia dehan, Governu promete katak ezekusaun ba Orsamentu estadu sei la’o ho kualidade, maski estrutura Governu seidauk sei defisiénsia hela.

Tanba ne’e, Xefe Governu promete kontinua halo diálogu ho Xefe Estadu nune’e fó pose ba membru governu ne’ebé pendente, atu responsabilidade Governu hodi ezekuta orsamentu ho kualidade no transparénsia iha boa governasaun.  

Read 3039 times
Rate this item
(0 votes)
MidAd1