Komisaun Espesializada Hahú Debate OJE Kada Ministeriál Featured

By Jacinto Xavier Agostu 16, 2018 7517
PPN, Arão Noe de Jesus PPN, Arão Noe de Jesus

DILI: Parlamentu Nasionál (PN) liu husi komisaun espesializada sira, ohin, Kuarta (15/8), hahú marka audiénsia ho membru governu sira atu diskute kona-ba orsamentu kada ministeriál.

Prezidente Parlamentu Nasionál (PPN), Arão Noe de Jesus hatete, Parlamentu Nasionál liu husi plenária aprova karakter debate ba proposta lei Orsamentu Jerál Estadu (OJE) 2018 ho karakter urjénsia.

“Komisaun espesializada sira sei halo marka audiénsia ho membru governu sira atu haree sira nia alokasaun orsamentu ministeriál nian”, dehan nia, iha Uma Fukun PN, horisehik.

Tuir regra, komisaun espesializada atu halo audiénsia públiku ho kada ministériu sira ne’e ho durasaun loron 6, kuandu remata sei submete ba komisaun C PN atu bele halo relatóriu pareser mai iha plenária.

Nune’e, kontinua ba debate iha espesialidade loron rua no jeneralidade loron lima, inklui finál globál. Sei prepara redasaun finál kuandu remata posibilidade iha loron 10 Setembru bele submete kedas ba Prezidente Repúblika atu halo promulgasaun.

Prezidente PN liu husi enkontru lidere bankada sira sei sujere atu debate OJE ne’e maizumenus iha loron 28 Augustu 2018 ne’e bele tama ona ba diskusaun jeneralidade nian, maibé data ne’e seidauk fiksu tanba sei deside husi Presidente Bankada sira.

Alende ne’e, Prezidente PN preokupa mós ho kandidatura membru governu ne’ebé to’o oras ne’e seidauk kompletu tanba bele afeta ba debate OJE nian.

Tuir informasaun ne’ebé iha, lei orgánika mós to’o oras ne’e Xefe Estadu seidauk promulga, tanba komisaun sira atu halo audiénsia ho ministériu sira atu diskute área temátika sira ne’e tenke define husi lei orgánika governu nian.

Alende ne’e, ministériu balun seidauk iha ministru, komisaun espesializada sira halo audiénsia ho ministériu ne’ebé nia estrutura inkompletu atu ko'alia ho se. Tanba ne’e tenke define husi lei orgánika governu nian.

Rate this item
(0 votes)

Independente Digital TV