Jerente Kompañia São João, Humberto da Costa hateten, durante fulan ida-resin ona kompañia seidauk bele selu vensimentu traballadór sira nian tanba governu seidauk selu tusan.

Maski traballadór sira seidauk simu osan, maibé servisu atendimentu ai-han ba pasiente sira kontinua la’o nafatin hanesan baibain.

“Seidauk simu saláriu ne’e la fó impaktu ba moras atu la han. Ema moras ne’e sei han nafatin”, tenik nia, iha HNGV, Bidau, horisehik.

Prosesu transferénsia orsamentu ba kompañia nian, tuir informasaun sei halo iha loron 15 Agostu. Tanba ne’e, bainhira osan tama ona, kompañia bele ona selu hikas traballadór sira.

Iha fatin hanesan, traballadór São José, Manuel Dias Menezes, rekoñese katak sira fulan ida-resin seidauk simu osan. Ne’e duni, sira mós preokupa makaas tanba fo impaktu mós ba ekonomia família nian.

“Foin dauk dia 6 Agostu ami hasoru ho Diretór Nasionál HNGV no promete ona katak dia 15 Agostu sei halo pagamentu, maibé karik la selu nafatin maka ami tenke foti asaun ruma, tanba ami mai servisu mós presiza osan hodi selu karreta”, tenik nia.

Iha fatin hanesan, traballadora Agostinha da Costa hateten, sei la para servisu tanba nu’udar ema umanu no servisu hodi fó hahán ba moras.

Tanba ne’e, maski seidauk simu saláriu, sei la foti desizaun hodi para. Maibé husu ba ministériu kompetente atu bele rezolve lalais problema ne’e tanba traballadór sira ezije sira-nia direitu.

Tuir relatóriu ne’ebé fó sai husi Ministériu Saúde, dívida Kompañia São José ne’ebé durante ne’e fornese ai-han ba pasiente sira hamutuk rihun $100 mak seidauk selu.