Print this page

Governu Hahú La Kontaktu Autoridade RAEOA Featured

By Jacinto Xavier Agostu 21, 2018 9912
Leónia Monteiro Leónia Monteiro

DILI: VIII Governu Konstitusionál no Autoridade Rejiaun Autónoma Espesiál Oekusi-Ambenu (RAEOA) hahú la liga malu. Bainhira elabora orsamentu anual 2018 nian laiha koordenasaun ho autoridade RAEOA nian.

Iha proposta Orsamentu Jerál Estadu (OJE) 2018 nian reve fundu hamutuk tokon $28, ne’ebé dook liu husi proposta ne’ebé Autoridade REAOA nian aprezenta ba Governu ho montante tokon $112.

Adjunta Prezidente Autoridade REAOA ba Apoiu Dezenvolvimentu Ekonomia no Finansas, Leónia Monteiro hatete, Autoridade RAEOA halo ona proposta hodi sujere ba governu atu aloka osan ho montante tokon $112 atu halo dezenvolvimentu iha Oekusi durante tinan ida nian.

Husi totál osan tuir planu RAEOA nian sei aloka ba kategoria haat hanesan saláriu no vensimentu, bens servisu, transferénsia publika no kapitál dezenvolvimentu.

“VIII Governu Konstitusionál aloka fali osan tokon $28 ne’ebé ami autoridade laiha koñesimentu, maibé ami haree fali iha proposta ne’e osan tama ona ho montante ne’ebé ki'ik tebes”, dehan Leónia, iha Uma Fukun PN, horisehik.

Nia hatutan, relasiona ho situasaun ne’e Prezidente RAEOA, Mari Alkatiri, konfirma direita mai iha tékniku finansas nian, maibé sira hataan katak orsamentu hirak ne’e kategoria ba duodesimal nian.

Orsamentu tokon $28 ne’e Autoridade RAEOA konsege jere ona tokon $18 tanba ne’e osan restu sei iha hela tokon $10 atu utiliza fulan haat ikus ne’e.

Tuir sira, osan ho montante ki'ik hanesan ne’e la to’o tanba governu fó de’it osan ne’e ba de’it saláriu vensimentu, bens servisu no transferénsia publika.

Maibé projetu ZEEMS ne’e fó prioridade ba asuntu infraestrutura bázika sira iha Oekusi ne'ebá harii eskola no postu saúde, iha sub-rejionál sira, maibé seidauk kompletu hotu.

Tanba ne’e, presiza tan osan ba kapitál menór nian atu bele halo kompletu dezeñu interna hanesan mobiliáriu no saúde nian bele kompleta ona materiál ne’ebé presiza uza ba atendimentu pasiente sira. Maibé, governu la tau osan ba ida ne’e.

Leónia hatutan, maski governu sentrál reve ona osan ho montante hanesan ne’e, maibé hanesan autoridade iha responsabilidade atu simu nafatin osan ne’e hodi jere tu’ir fíziku osan ne’ebé alokadu ona.

Rate this item
(0 votes)

Related items