Suku Muapitine kompostu husi aldeia lima ho totál populasaun 2.421 ho uma kain 486.
Aldeia Malahara ho totál populasaun hamutuk 558, mane 269, feto 319 ho uma kain 112, aldeia Vailoro ho populasaun na’in 499, mane 253 no feto 246 ho uma kain 101, Aldeia Muapitine ho populasaun 443 kompostu husi mane 200 , Feto 243 ho uma kain 96, Aldeia Lopuloho iha uma kain 67 ho totál populasaun 351, mane 165 no feto 186 no aldeia Pehefito ho populasaun 540, mane 279, feto 279 ho uma kain 110.
Suku Muapitine tama mós área protejidu parque Nasionál Nino Konis Santana ne’ebé iha área potensiál ba setór agrikultura, pekuária no turizmu komunitariu no istóriku tanba besik liu foho Paicau ne’ebé lider rezisténsia luta libertasaun nasionál barak subar iha área ne’e.
Kondisaun Estrada diresaun husi kapitál Lospalos ba iha suku Muapitine kuaze aat totál tanba nakonu ho tahu hodi difikulta komunidade sira lori nia produtu lokál ba iha merkadu.
Tan ne’e, Xefe Suku Muapitine, Lívio Mendes husu ba Governu liu husi Ministériu obra públiku (MOP) atu hadi'a urjente estrada diresaun kapitál Lospalos mai suku Muapitine atu bele fasilita komunidade sira bele lori nia produtu lokál ba iha merkadu.
“Ami nia estrada ne’e kondisaun aat tebes tanba kuandu iha tempu udan tahu mak nakonu. Husu governu atu hadi’a lalais,’’ dehan autoridade lokál ne’e liu husi via telefone, horisehik.
Autoridade lokál ne’e dehan, iha suku ne’e populasaun maioria iha vida agrikultór,maibé atu lori produtu lokál ne'ebé produs ba merkadu difisil tebes.
Governu liu husi Obras públiku dala barak halo ona survei, maibé seidauk responde urjente ezijénsia populasaun nia. Foin lalais International Labour Organisation liu husi programa RD4 ba estrada rurál halo mós survei ona, maibé seidauk iha responde pozitivu.
Lívio Mendes dehan, distánsia estrada husi kapitál munisípiu (Lospalos) ba suku Muapitine kuaze kilómetru 23.
Iha fatin ketak, Juventude Suku Muapitine Deonijio Víctor ‘Mau Meta’, husu ba governu atu hadi’a urjente estrada diresaun kapitál Lospalos ba suku Muapitine tanba kondisaun aat tebes hodi difikulta agrikultór sira lori produtu lokál ba merkadu.
“Ami ezije ba governu atu hadi’a lalais estrada diresaun Lospalos ba suku Muapitine,”nia husu.
Tanba nia dehan, kondisaun estrada ba suku Muapitine di’ak, nia fiar katak turista lokál, nasionál no estranjeiru bele fasil halo movimentasaun atu haree lagoa Ira-lalaro no foho Paicau tanba ho paizajen ne’ebé furak.
Molok ne’e, Ministru Obras Públikas, Salvador Eugénio Pires dehan, MOP prepara ona referénsia atu halo tenderizasaun iha tinan 2019 no konstrusaun sei hala’o iha tinan 2020.
Iha OJE 2019 MOP, nia dehan tau orsamentu tokon $16 ba kapitál dezenvolvimentu ne’ebé planu atu estabelese estrada rurál hamutuk projetu 96.
“Montante orsamentu ne’ebé ami tau ba infraestrutura bee moos ho estrada iha territóriu tomak hamutuk tokon $10, osan ne’e ita tau atu halo planu no 2020 ita bele implementa tuir lista ne’ebé ami iha,”dehan Salvadór ba jornalista iha Palásiu Governu Dili, tersa foin lalais ne'e.
Governu mós prepara hela tokon $11, atu halo manutensaun ba estrada protokolu sira ne’ebé liga ba munisípiu sira inklui kapitál Dili laran.
MOP hein bainhira Ministériu Finansas aloka orsamentu, MOP hahú implementa planu ho programa ba 2019-2020 nian bazeia ba VIII Governu Konstitusionál nian.
