Jakarta, 12 Marsu 2026- Programa bolsa estudu Feto iha Siénsia, Teknolojia, Enjeñária no Matemátika (STEM) husi ASEAN-Reinu Unidu, ko-finansia husi British Council no Misaun Reinu Unidu ba ASEAN, fornese finansiamentu ba kursu mestradu durante tinan ida iha universidade no instituisaun peskiza sira ho ranking aas iha Reinu Unidu, ho objetivu atu hasa’e oportunidade feto sira nian iha STEM, haforsa lideransa feto sira nian iha siénsia no inovasaun, no promove liu tan diversidade no jéneru iha setór STEM nian.
Kada bolsa estudu ba tinan akadémiku 2026-27 iha osan mínimu £40,000, inklui propinas, alojamentu, osan ba viajen no vistu,osan ba saúde no apoiu ba Lian Inglés. Bolsa estudu ne’ebé bele halo mudansa ba moris, fasilita asesu ba universidade sira rekoñesidu mundialmente iha siénsia no peskiza iha Reinu Unidu no ba plataforma sira ne’ebé sei ajuda halo ligasaun ho peritu sira iha área STEM no alumni mundiál sira Reinu Unidu nian.
Bolsa estudu 20 dadaun ne’e loke hela ba kandidatu feto sira husi nasaun Ásia Leste nian, serbisu hamutuk ho universidade 4 husi Reinu Unidu.
Dra Jen Bardsley, Diretór Globál Apoiu ba Investigasaun & Siénsia husi British Council hatete “ida ne’e fantástiku tebes atu organiza fali ita-nia programa bolsa estudu Feto iha STEM ba tinan akadémiku 2026-27. Programa ne’e ho objetivu atu hamenus barreira sira ne’ebé impede feto sira nia karreira iha STEM no kria liu tan reprezentasaun ida inkluziva no diversifikada iha siénsia iha ne’ebé ita hatene bele dezenvolve liu tan siénsia no bele lori rezultadu di’ak liu tan ba ema hotu”.
Summer Xia, Diretóra Nasionál ba Indonésia no Diretór Regional ba Sudeste Asiátiku British Council nian, hatete “ami kontinua haree talentu no ambisaun boot tebes entre feto sira ne’ebé hakarak foti kursu iha área STEM nian. Maibé, barak mak sei kontinua enfrenta hela barreira estruturál sira atu foti estudu avansadu no oportunidade peskiza globál sira. Liu husi bolsa estudu Feto iha STEM, ami hakarak atu apoia feto sira iha ASEAN tomak inklui Indonésia no Timor-Leste ne’ebé mak prontu ona atu foti pasu tuir mai iha sira nia jornada STEM nian no kontribui ba inovasaun, sustentabilidade, no progresu sosiál iha sira nia nasaun rasik no iha mundu. Ami sente orgullu tebes hodi loke kandidatura ba tinan ida ne’e nian no anziosu tebes atu haree feto indonézia barak liu tan mak lidera no define futuru STEM nian”
Ba detallu bolsa estudu nian ne’ebé mak disponivel ba Indonésia no Timor-Leste favór visita https://www.britishcouncil.org/study-work-abroad/in-uk/scholarship-women-stem
Kandidatura ba bolsa estudu Feto iha STEM sei loke to’o fulan Abril nia rohan, tinan 2026.
Kona-ba Bolsa Estudu no Programa ASEAN-Reinu Unidu nian
https://www.britishcouncil.org/study-work-abroad/in-uk/scholarship-women-stem
Bolsa estudu ko-finansiada husi British Council no Misaun Reinu Unida ba ASEAN. 2026 marka nia aniversáriu ba tinan 5 hanesan parseiru diálogu ASEAN nian.Kandidatu feto sira ba bolsa estudu Feto iha STEM husi nasaun membru 11 ASEAN nian bele aplika ba programa ne’e hodi estuda kursu sira ne’ebé selesionadu ona iha universidade rua hanesan ami nia parseiru iha Reinu Unidu, Cranfield University no Stirling University.
Kona-ba British Council
British Council hanesan organizasaun internasionál Reinu Unidu nian ba relasaun kulturál no oportunidade edukasionál sira. Ami harii ligasaun sira, komprensaun no fiar entre ema sira iha Reinu Unidu no nasaun seluk liu husi arte no kultura, edukasaun no lian Inglés. Iha tinan kotuk ami konsege atinji diretamente ema liu tokon 80 no totál ema tokon 791 liu husi televizaun, publikasaun inklui pataforma online sira. Harii iha tinan 1934, ami hanesan instituisaun karidade británika regula liu husi Karta Real no organismu públiku Reinu Unidu nian.Ami simu apoiu finanseiru básiku ho totál 15% husi Governu Reinu Unidu nian.
Kona-ba Missaun Reinu Unidu ba ASEAN
https://www.gov.uk/world/organisations/uk-mission-to-asean
Misaun Reinu Unidu nian ba ASEAN ho ninia objetivu mak atu hakle'an liután ita-nia envolvimentu ho ASEAN, bazeia ba kooperasaun sira ne'ebé eziste ona no esplora dalan foun sira atu kolabora ho organizasaun no ninia estadu membru sira.
