“Ami veteranu sira sei sei buka malu hodi hili reprezentante na'in hira hanesan hodi ba hasoru Presidente Repúblika Francisco Guterres ‘Lu-Olo’, Primeiru Ministru, Taur Matan Ruak, no Comandante em Chefe das FALINTIL, Kay Rala Xanana Gusmão, hodi husu ba sira kona-ba impase polítika ne’e”, dehan veteranu Vidal de Jesus ‘Riak Leman’, iha sede CNRT, Sábadu (7/8).
Nia hatutan, iha ukun aan tempu atu halo dezenvolvimentu nasionál hodi hadi'a povu nia moris, uluk iha okupasaun tempu ne’ebé difisil tebes timoroan barak hamutuk sai ida de’it hodi rona komandu ida, maibé tansá iha ukun aan ne’e labele rona malu hodi dezenvolve povu nia moris.
Veteranu observa, moris povu nian iha territóriu laran tomak kuaze maioria sei moris veneravel tebes, sira balun uma seidauk di'ak, la asesu ba eletrisidade, estrada, saúde, edukasaun, bee moos no saneamentu tanba ne’e tuir loos lider boot sira tenke hare ba ida ne’e hodi tuur hamutuk hodi rezolve.
Povu ne’e uluk sakrifika aan ona ba luta ne’e sira tanis, mate, soe hela inan, aman, oan iha mota kuak ai-kuak too ohin loron balun seidauk hetan nia ruin, balun kee hada iha osoariu iha munisípiu 13 maibé seidauk haloot iha nia fatin.
“Ami husu nafatin atu labele kontinua sakrifika povu terus na'in sira iha ukun aan ne’e, ami veteranu no povu ai-leba sira hakarak mós moris di'ak hanesan ho ema seluk”, tenik nia.
Atu dezenvolve povu nia moris presiza hakotu ona impase polítika ne’e, Presidente Repúblika no Primeiru Ministru tenke tuur hamutuk lalais hodi rezolve membru governu na'in sia seluk ne’ebé seidauk hetan pose ne’e.
Governu nia programa pasa ona hein Orsamentu Jerál Estadu (OJE) nian kuandu ne’e kompleta ona hein halo ezekusaun, maibé membru governu inkompletu oinsá atu implementa programa hirak ne’e hodi fó moris di'ak ba povu.
Tanba ne’e, Xefe Estadu halo ona pose ba sira ne’ebé seidauk simu pose ne’e, karik ba sira seluk ne’ebé dehan komete korrupsaun lori ba Tribunál, karik sira sala duni ba hatama iha komarka labele hodi ida ne’e dada malu beibeik.
Antes ne’e, tuir Primeiru Ministru, Taur Matan Ruak hatete, governu iha ona kandidatura membru governu hodi hein Prezidente Repúblika atu fó pose.
