Observasaun diáriu ne’e iha Uma Fukun PN ajenda normál iha Parlamentu Nasionál, iha Segunda no Tersa halo diskusaun plenária no kuarta to’o sesta servisu iha komisaun espesializada no mós fiskalizasaun ba obra governu nian.

Maibé, iha durante semana rua tuituir malu ona servisu komisaun no plenaria la funsiona, tanba la hetan prezensa husi deputadu sira.

Iha Tersa (5/12), horisehik, deputadu sira halo servisu pelu-kontráriu deputadu AMP mai iha sala plenária hodi hein Prezidente PN atu funsiona diskusaun no bloku koligasaun iha de'it komisaun temátika hodi hein diskusaun ba orsamentu retifikativu.

Haree ba ambiente servisu iha órgaun lejizlativu ne’e, Prezidente Bankada FRETILIN, Francisco Miranda Branco hatete, razaun bloku koligasaun la marka prezensa iha plenária, tanba tuir rejimentu interna PN, bainhira orsamentu estadu nian Prezidente PN hatún ona ba komisaun temátika sira, servisu hotu tenke blokeiu, hodi foka liu ba asuntu ne’e.

Situasaun ne’e la’ós ona novidade foun. Akontese ona iha lejizlatura tolu ba kotuk no ohin loron sai hanesan ona rejimentu, tanba proposta orsamentu retifikativu ne'ebé governu lori mai tenke debate lalais hodi responde nesesidade povu nian.

Kuandu proposta orsamentál Governu haruka mai iha PN, tenke ajenda tuir loron ne'ebé determinadu, hafoin halo fali atividade seluk.

Nune’e, prosesu hotu-hotu la’o normál. OR agora iha ona komisaun nia liman, maibé deputadu AMP la fó konsiderasaun no la rekoñese maski osan sira ne’e atu utiliza ba responde nesesidade povu nian.

Iha fatin hanesan, Deputadu AMP, Natalino da Costa hatete, proposta OR ne'ebé governu lori mai iha PN, antes ne’e halo ona rekursu. Tanba ne’e, Prezidente PN responde lai mak ba haree fali atu diskute ka lae.

“Pratika normál kuandu proposta orsamentu ruma tama atividade hotu para atu atende urjente, maibé laiha rejimentu ida mak bandu”, dehan nia.

Nia hatutan, tuir rejimentu PN nian, Segunda no Tersa halo plenária, maibé agora ne’e laiha tanba Prezidente PN mak laiha vontade atu dirije parlamentu nasionál.

Tuir loloos, atu hapara plenária tenke hetan konkordánsia husi lider bankada sira, hodi diskute iha plenária tenke deputadu ­2/­­3 fó votu hafoin bele suspende, maibé ne’e laiha Prezidente PN mak hapara justifika ruma.