Primeiru Ministru (PM), Taur Matan Ruak hateten, membru governu na’in tolu hanesan Samuel Marçal, Alfredo Pires no Rogério Mendonça laiha problema. Maibé tempu mak seidauk oportunu atu sira simu pose.

“Se Prezidente Repúblika marka ona data ita boot sira sei hatene, maibé kona-ba Ministru na’in tolu ne’e laiha problema,” dehan nia, iha Palásiu Prezidensiál Bairru-Pité, horisehik.

Eis-Prezidente ne’e realsa katak, bainhira Xefe Estadu iha ona tempu atu fó pose ba membru VIII Governu nian, sei fó sai ba públiku atu akompaña prosesu ne’e.

Iha fatin hanesan, eis-Prezidente Repúblika, José Ramos Horta hateten, Governu tenke haree didi'ak kualidade membru governu sira atu servisu ba dezenvolvimentu nasaun nian bele iha rezultadu.

“Ha’u la hatene no ha’u la komenta kualidade membru governu ha’u la koñese, maibé Prezidente preokupasaun ida ne’e no Primeiru Ministru mós iha preokupasaun ida ne’e. La'ós de’it iha partidu sira, maibé Xefe partidu sira bainhira hili ema ba governu tenke haree didi’ak”, tenik nia.

Laureadu Nobel da Pás ne’e hateten, governu atu serve povu ho matenek ho esperiénsia, entaun diálogu ne’e sira maka tenke halo. Hanesan sidadaun fiar iha tempu badak sei iha rezultadu tanba Primeiru Ministru halo esforsu duni.