Tuir Konstituisaun bainhira Xefe Estadu viajen ba estranjeiru tenke iha deliberasaun husi PN hodi fó autorizasaun. Tanba ne’e, liu husi sesaun plenária maioria deputadu sira kansela ona viajen PR Lú-Olo nian ba Portugál liu husi votasaun kontra 35 no afavor 29, nune’e dezlokasaun ne’e kanseladu.
Presidente Bankada Partidu Demokrátiku (PD), António da Conceição hatete, vizita Estadu Prezidente Repúblika ba Portugál ne’e importante tebes, tanba bele halo lasu amizade entre governu no povu rai rua ne’ebé kuaze kultura no polítika atu hanesan.
“Atu hametin relasaun bilaterál husi nasaun rua ne’e nian, tanba ne’e importante tebes atu husik Xefe Estadu halo vizita Estadu”, dehan nia, iha Uma Fukun PN, horisehik.
Nia hatutan, situasaun iha rai laran la’o di'ak hela laiha situasaun ne’ebé emerjénsia. Tanba ne’e, tenke kansela viajen ne’e hodi Xefe Estadu la kumpre konvite husi Portugál.
Iha fatin hanesan, tuir deputadu Francisco Vasconcelos hatete, haree ba situasaun polítika interna, kuandu formasaun VIII Governu Konstitusionál sei pendente hela, la hataan Xefe Estadu sai ba estranjeiru.
Iha momentu ne’e povu no nasaun presiza Xefe Estadu nafatin iha rai-laran, hodi hatudu nia bele hatán ba responsabilidade konstitusionál ne’ebé iha nia kabas leten, hodi mós kontribui ba estabilidade polítika, governativa Estadu nian.
Iha tinan kotuk, Prezidente Repúblika rasik kansela dezlokasaun ba Novaiorke, atu partisipa iha Asembleia Jerál ONU nian, ho razaun katak sei akompaña formasaun VII Governu nian, hodi bele fó lalais pose, tuir kondisaun polítika iha tempu ne'ebá.
Sei laiha ema ida bele komprende katak, iha momentu ne'ebé Estadu laiha osan atu selu servidór Estadu nian no garante servisu seluk ba povu, Prezidente Repúblika buka de'it nia di'ak hodi ba goza ho komitiva boot ba to’o Portugál, atu gasta tan osan iha ne'ebá.
Falta sensatés no prudénsia, ne'ebé karik iha pasadu akontese ona, labele tan repete iha Parlamentu Nasionál durante Lejizlatura ne’e. Tanba ne’e, labele duni autoriza Prezidente Repúblika halo nia viajen ba rai-li'ur, enkuantu impase polítiku ne'ebé nia rasik kria la rezolve.
