Vise-Prezidente Parlamentu Nasionál, Maria Angelina Sarmento hateten, PM Taur pronunsia ona posibilidade halo remodelasaun ba Governu. Ne’e duni, fó fiar ba Xefe Governu atu selesiona kandidatu membru governu sira.

“Remodelasaun ne’e sei iha oportunidade hodi haree fila-fali kandidatu ministru sira ne’ebé sei bele troka membru governu agora ho meius ida ne’e bele ajuda hamenus impase polítika ne’e”, dehan nia, iha Uma Fukun PN, horisehik.

Inisiativa ne’ebé PM Taur iha, atu halo remodelasaun no indika pesoa konfiansa husi AMP nian ba tuur iha governu no hein katak Prezidente Repúblika labele impede nafatin.

“Atu halo bainhira no sé-sá maka sei afeta husi desizaun polítika ida ne’e to’o agora ami seidauk hatene”, tenik Maria Angelina.

Nia hateten, servisu membru governu sira nian labele sukat iha loron 100 tanba sira labele halo buat barak ho tempu ne’ebé limitadu.

Maski la’o neineik maibé ho prestasaun ne’ebé di'ak povu sente Governu halo duni atendimentu públiku ho di'ak. Ne’e duni, loron 100 hanesan alvu maibé ne’e konsidera hanesan rezultadu kuantitativu la’ós kualitativu.

Ne’e duni, enkoraja nafatin governante sira atu labele duni tempu hodi halo ezekusaun aas, maibé la tuir públiku nia-hakarak maibé tuir governu hakarak.

Entretantu, tuir nia, membru governu ne’ebé to’o ohin loron seidauk kompletu ne’e kompeténsia PM nian, maibé prosesu bele difikulta ba ezekusaun orsamentu jerál ne’ebé aprovadu ona.

Membru governu ne’ebé seidauk kompletu iha ministériu xave sira hanesan, Ministériu Turizmu (MI), Ministériu Komérsiu Indústria no Ambiente (MKIA), Ministériu Interiór (MI), Ministériu Petróleu no Rekursu Minerais (MPRM), ne’e presiza atu kompleta tanba sira servisu atu bele dezenvolve área sira ne’e hodi fó retornu ba Estadu.