Prosesu formasaun ne’e sei estagna iha fatin, tanba partidu tolu FRETILIN-PLP-KHUNTO presiza atu hakle'an liután diskusaun kona-ba koligasaun nian.
Vise-Prezidente PLP, Fidelis Magalhães hateten, sira la sente laran moras (cemburu) ho suru-mutu entre FRETILIN ho CNRT, tanba PLP hetan konvite de’it husi partidu mais votadu atu bele hamutuk hodi forma governu.
Nia esplika, PLP nunka sente dezapontadu ho polítika partidu FRETILIN nian ne’ebé kontinua bolu nafatin partidu sira seluk hodi halo diskusaun, maibé FRETILIN-PLP-KHUNTO iha ona dalan atu hakle'an liután diskusaun kona-ba koligasaun. Ne’e duni, diskusaun entre lideransa sira la’o nafatin.
Fidelis dehan, iha faze diskusaun nia laran importante mak partidu sira ne’e tenke nakloke ba malu. Maibé, diskusaun durante ne’e kontinua aberta ho onestu hodi ko'alia saida mak sira hakarak, liuliu iha programa no proporsionalidade.
“Prinsípiu PLP nia maka hakarak kontribui ba governasaun ne’ebé di’ak”, tenik nia via telefone, horisehik.
Vise-Prezidente PLP rasik la esplika klaramente konkordánsia ba koligasaun entre partidu rua ne’e nian, maibé konsidera konkordánsia ne’e sei la'o. Tanba importante husi PLP mak diskusaun kontinua la’o hodi tau hamutuk ideia no programa sira entre partidu rua ne’e.
“Konkordánsia ne’e etapa husi diskusaun ne’ebé la’o”, dehan Fidelis.
KHUNTO La Retira
Entretantu, Sekretáriu Jerál KHUNTO, José Agostinho da Silva hateten, sira nia partidu mantein nafatin pozisaun katak kontinua halo koligasaun ho FRETILIN-PLP-KHUNTO hodi forma governu.
Prosesu ne’ebé la’o mak partidu tolu ne’e sei kontinua hela halo diskusaun kle'an intermus tékniku nian kona-ba plata forma governu.
“Prosesu diskusaun entre partidu tolu ne’e rasik agora iha faze elaborasaun plata forma governu nian”, tenik nia.
Hafoin iha ona konkordánsia ba plata forma governu, José José Agostinho da Silva hatutan, sei kontinua ko'alia kona-ba proposionalidade partidu tolu ne’e iha governu.
Ne’e duni, fila-fali ba kompeténsia partidu mais votadu atu kria kondisaun hodi prosesu ne’e bele la'o di'ak liután.
