Vise-Prezidente Bankada FRETILIN, Francisco Miranda Branco hatete, OJE 2018 ho montante biliaun $1.2 barak liu atu selu dívida ba kompañia sira ne’ebé kaer obra Estadu.

Tuir nia, hamutuk projetu 142 ne’ebé Governu anteriór ‘fahe’ ba kompañia sira antes tama ba Eleisaun Parlamentár 2017 liubá, deskonfia barak halo adjudikasaun direta (single source) ne’ebé sei selu mós ho OJE 2018 nian.

Ne’e duni, husu ba Parlamentu Nasionál liuliu Komisaun Permanente Espesializada Infraestrutura nian atu halo akompañamentu ba likidasaun kontas nian.

“Tuir loloos ne’e Prezidente Parlamentu Nasionál hatún ona despaxu atu nune’e bankada aprezenta ona nia-ema hodi envolve iha ekipa inkéritu ne’e, maibé prosesu ne’e la la'o, ho nune’e ami husu atu aselera prosesu ne’e”, dehan nia, iha Uma Fukun PN, horisehik.

Bankada FRETILIN halo ona rekerimentu atu harii ekipa inkéritu parlamentár iha loron 9 Setembru liu ba, maibé to’o agora la akontese. Tuir loloos ne’e kuandu rekerimentu tama ba meza Presidente PN durante loron ualu (8) nia-laran tenke iha ona despaxu atu harii ekipa ne’e rasik.

Atu halo rekerimentu tuir lei deputadu 1/3 mak tenke asina, maibé ne’e liu ona númeru. Tanba ne’e, bazeia ba lei kona-ba inkéritu parlamentár nian obrigadu Presidente PN tenke hatún despaxu hodi hari komisaun inkéritu.

Bainhira promulga OJE 2018 nian, Prezidente Repúblika, Francisco Guterres 'Lú Olo' mós hateten, orsamentu ne’e atu selu kotu tusan ne’ebé la konsege selu tanba limitasaun orsamentu iha rejime duodesimu, iha futuru labele monu tan iha tusan sira hanesan ne’e tanba la selu iha ninia tempu rasik.

Nune'e, Parlamentu Nasionál hataan ona atu harii Komisaun Inkéritu Parlamentár hodi fiskaliza projetu sira antes atu selu.

“Ha’u apela ba Parlamentu Nasionál atu harii lalais Komisaun ida ne’e atu nune’e prosesamentu pagamentu hotu bele tuir ne’ebé loos ho transparénsia no rigór”, dehan Lú Olo.

Entretantu, Prezidente Bankada PUDD, António de Sá Benevides hatete, OJE 2018 nian ne’e barak liu ba selu dívida ba projetu. Ne’e duni, tenke verifika didi'ak atu bele selu no ne’ebé mak la merese atu selu.

Iha fatin hanesan, Prezidente PN, Arão Nóe de Jesus hatete, prosesu atu harii inkéritu parlamentár ne’e sei la’o hela maibé dala barak komentáriu sira ne’ebé mosu iha públiku baralla ema nia pensamentu hanesan la tau importánsia ba kestaun ne’e.

Nia esplika, rekerimentu ne’e tama ona, tanba ne’e sei haree iha tempu badak nia-laran hodi harii komisaun inkéritu parlamentár ne’e.