To’o loron ne’ebé determina ona, Tribunál Rekursu sei simu lista iha oras servisu nian ka to’o 17:00 lokraik. Liu tempu ida ne’e tribunál sei la admite atu partidu ne’e konkorre iha eleisaun antesipada.
To’o Tersa (2/3), horisehik, partidu sira ne’ebé hatama ona lista kandidatura maka Partidu Esperansa da Pátria (PEP), Partidu Republikanu (PR) koligasaun Movimentu Dezenvolvimentu Nasionál (MDN), Aliansa Mudansa ba Progresu (AMP), Movimentu Sosiál Demokrátiku (MSD) ho totál hamutuk partidu lima (5) maka aprezenta ona lista.
Prezidente Tribunál Rekursu, Deolindo dos Santos hateten, partidu rua PR no MDN Tribunál Rekursu verifika ona no haruka ba Sekretariadu Tékniku Administrasaun Eleitorál (STAE) atu hare rekizitu balun ne’ebé seidauk estabelese, iha loron sanulu (10) nia laran, hodi bele informa fali mai Tribunál Rekursu.
“Depois Tribunál Rekursu sei fó hatene fali ba partidu polítiku sira atu bele hadi'a fali buat balun ne’ebé sei falta ne’e, iha loron rua nia laran”, dehan nia, iha servisu fatin, Kaikoli-Dili, horisehik.
Entretantu, partidu tolu seluk hanesan AMP, MSD no PEP, Tribunál Rekursu sei halo verifikasaun hafoin bele haruka fali ba STAE.
Nune’e, hafoin partidu polítiku hotu-hotu aprezenta lista kandidatura no hetan ona verifikasaun husi Tribunál Rekursu no STAE hafoin foti desizaun ikus husi tribunál hafoin bele hatene partidu hirak maka iha direitu atu konkorre iha eleisaun antesipada ne’e.
Partidu polítiku ualu (8) maka iha posibilidade sei konkorre iha eleisaun antesipada. Partidu sira ne’e kompostu husi koligasaun haat (4) no partidu individuál haat (4).
Partidu haat ne’ebé la’o mesak maka hanesan partidu Frente Revolusionáriu Timor-Leste Independente (FRETILIN), Partidu Demokrátiku (PD), Partidu Republikanu (PR), Partidu Esperansa Povu (PEP).
Nune’e, partidu sira ne’ebé tama iha koligasaun mak hanesan Aliansa Mudansa ba Progresu (AMP) ne’ebé kompostu husi Congresso Nacional Reconstrução Timor-Leste (CNRT), Partidu Libertasaun Populár (PLP) no partidu Kmanek Haburas Unidade Nasionál Timor Oan (KHUNTO).
Koligasaun seluk mak hanesan Frente Dezenvolvimentu Demokrátiku (FDD) kompostu husi Partidu Unidade Dezenvolvimentu Demokrátiku (PUDD), União Demokrátiku Timorense (UDT), Frente Mudansa (FM) no Partidu Dezenvolvimentu Nasionál (PDN).
Partidu koligasaun Movimentu Sosiál Demokrátiku (MSD) ho kompozisaun husi Partidu Sosilista Timorense (PST), Partidu Sosial Demokrata (PSD) Centro Acção Social Democrata Timorense (CASDT), União Demokratico Cristão – Partidu Democatico Cristão (UDC-PDC).
Nune’e, koligasaun ikus liu maka Movimentu Dezenvolvimentu Nasionál (MDN) ho kompozisaun husi Partidu Liberta Povu Aileba (PLPA), Movimentu Libertasaun Povu Maubere (MLPM), Asosiasaun Populár Monarkia Timorense (APMT) no Unidade Nacional Democrática da Resistência de Timorense (UNDERTIM).
